Inklıýzıvti bilim berýdi qoldaý men pedagog quqyǵyn qorǵaý mańyzdy – 43 jyldyq eńbek ótili bar ustaz
ASTANA. KAZINFORM – Astana qalasyndaǵy №18 orta mekteptiń tarıh pániniń muǵalimi Gúlaıym Rahymjanova Prezıdent Joldaýynda bilim berý salasyndaǵy ózekti máselelerge nazar aýdarylǵanyn atap ótti.
– Memleket basshysynyń ınklıýzıvti bilim berý máselesine erekshe toqtalǵany qýantady. Qazirgi tańda elimizde erekshe bilim berý qajettilikteri bar shamamen 237 myń bala bar. Olarǵa qolaıly orta qalyptastyryp, qajettilikterin erte anyqtaý jáne ár balaǵa jeke qoldaý kórsetý mańyzdy. Bul olardyń qabiletin ashyp, sapaly bilim alýyna múmkindik beredi, – dedi ustaz.
Sondaı-aq Gúlaıym Rahymjanova mektepterdegi bıýrokratııany azaıtyp, muǵalimderdiń negizgi jumysyna basymdyq berý qajettigin oń baǵalady.
– Muǵalimder keıde oqýshylar tarapynan dóreki sózder men ádepsiz áreketterge, tipti kúsh kórsetý jaǵdaılaryna tap bolady. Sondyqtan pedagogtiń mártebesin kóterýmen qatar, onyń quqyqtaryn qorǵaý qajet. Prezıdent aıtqandaı, mundaı máselelerge otbasy, oqýshy, muǵalim jáne mektep birdeı jaýapkershilikpen qaraýy kerek, – dep sanaıdy Gúlaıym Rahymjanova.
Bilim salasynda 43 jyl eńbek etken ustaz ınklıýzıvti bilim berýdi damytý, muǵalimderdiń artyq júktemesin azaıtý jáne olardyń quqyqtaryn qorǵaý máseleleriniń Joldaýda kóterilýin mańyzdy mindetter dep sanaıdy.
Aıta keteıik, Prezıdent 2027 jyldy Jalpyhalyqtyq aýqymdy qurylys jyly dep jarııalaýdy usyndy.
