Inklıýzıvti bilim berýdi damytý ortalyǵynyń dırektory taǵaıyndaldy

ASTANA. KAZINFORM — Arnaıy jáne ınklıýzıvti bilim berýdi damytýdyń ulttyq ǵylymı-praktıkalyq ortalyǵynyń dırektory bolyp Laýra Asqarqyzy Býtabaeva taǵaıyndaldy. Bul týraly ortalyqtyń baspasóz qyzmeti habarlady. 

Laýra Asqarqyzy ınklıýzıvti bilim berý salasynda aıtarlyqtaı tájirıbege ıe.

Abaı atyndaǵy QazUPÝ-de «Defektologııa» mamandyǵy boıynsha bilim alǵan. Polsha Respýblıkasy, Varshava qalasyndaǵy M.Gjegojevskaıa atyndaǵy Arnaıy pedagogıka akademııasynda bilim berý salasyndaǵy áleýmettik ǵylymdar doktory (Ph.D) dárejesin alǵan.

Pedagogıka mamandyǵy boıynsha qaýymdastyrylǵan professor (dotsent) ǵylymı ataǵynyń ıegeri.

Eńbek jolyn 2009 jyly Almaty qalasyndaǵy «Estý qabileti zaqymdalǵan balalarǵa arnalǵan № 137 bóbekjaı balalar baqshasynda» sýrdopedagog retinde bastaǵan.

2012-2021 jyldary Abaı atyndaǵy QazUPÝ-de aǵa oqytýshy, bólim jetekshisi, Túzeý pedagogıkasynyń Ulttyq ǵylymı-praktıkalyq ortalyǵynyń aǵa ǵylymı qyzmetkeri qyzmetterin atqarǵan.

2021–2023 jyldary Y. Altynsarın atyndaǵy Ulttyq bilim akademııasynda Inklıýzıvti bilim berý ortalyǵynyń dırektory, 2023 jyldan bastap Oqý-aǵartý mınıstrliginiń Inklıýzıvti jáne arnaıy bilim berý departamentiniń dırektory boldy.

Bul laýazymda Laýra Asqarqyzy erekshe bilim berý qajettilikteri bar balalardy qoldaý baǵdarlamalaryn, ádistemelik usynymdardy, normatıvtik-quqyqtyq bazany ázirleýdi qosa alǵanda, eldegi ınklıýzıvti bilim berý júıesin damytýǵa baǵyttalǵan memlekettik saıasatty qalyptastyrýǵa jáne iske asyrýǵa belsene qatysty.

Aıta keteıik, saıasat, ekonomıka, bıznes, ǵylym, mádenıet sekildi túrli salada el damýyna eleýli úles qosqan tanymal qazaqstandyqtardyń ómirbaıany men qyzyqty málimetterdi myna jerden oqı alasyz.