Inklıýzıvti bilim berý júıesinde qandaı ózgeris bolady
ASTANA. KAZINFORM — Balalardyń sapaly bilim alýyna jáne qajetti keshendi qoldaýǵa qoljetimdiligin keńeıtý úshin elimizdiń 20 óńirinde ońaltý jáne saýyqtyrý kabınetteri bar jańa formattaǵy 20 ınklıýzıvti mektep-keshen salý josparlanyp otyr.
Memleket basshysy Qasym-Jomart Toqaev Joldaýynda erekshe bilim berý qajettilikteri bar balalarǵa qajetti jaǵdaı jasaýdy tapsyrdy. Bul jumys qoljetimdi ınfraqurylymdy keńeıtýdi, maman tapshylyǵyn azaıtýdy jáne balalardyń qajettilikterin erte anyqtaýdy qamtıdy.
Balalardyń sapaly bilim alýyna jáne qajetti keshendi qoldaýǵa qoljetimdiligin keńeıtý úshin elimizdiń 20 óńirinde ońaltý jáne saýyqtyrý kabınetteri bar jańa formattaǵy 20 ınklıýzıvti mektep-keshen salý josparlanyp otyr.
Psıhologııalyq-medıtsınalyq-pedagogıkalyq konsýltatsııalar ashý normatıvin qaıta qaraý kózdelip otyr. Qazir bir konsýltatsııa 50 myń balaǵa eseptelgen. Bul kórsetkishti 40 myń balaǵa deıin tómendetý usynylýda. Bul óńirlerdegi konsýltatsııalar jelisin keńeıtip, balalar men ata-analar úshin mamandandyrylǵan kómektiń qoljetimdiligin arttyrýǵa múmkindik beredi.
2026 jylǵy 26 aqpanda Oqý-aǵartý mınıstrliginiń keńeıtilgen alqa otyrysynda Premer-mınıstrdiń orynbasary arnaıy jáne ınklıýzıvti bilim berý máseleleri boıynsha tapsyrma berdi. Ony oryndaý úshin júıeniń qazirgi jaǵdaıyna keshendi taldaý júrgizilip, negizgi máseleler men olardy sheshý baǵyttary aıqyndaldy. Sonyń nátıjesinde Inklıýzıvti bilim berýdi damytýdyń 2026–2030 jyldarǵa arnalǵan vedomstvoaralyq keshendi jospary ázirlendi. Qujat bıyl qyrkúıekte Oqý-aǵartý, Densaýlyq saqtaý, Eńbek jáne halyqty áleýmettik qorǵaý, Ǵylym jáne joǵary bilim, Týrızm jáne sport, Mádenıet jáne aqparat mınıstrlikterimen kelisilip, bekitildi.
Keshendi jospardyń negizgi maqsaty erekshe bilim berý qajettilikteri bar balalardy qoldaýdyń tıimdi vedomstvoaralyq júıesin qalyptastyrý. Ol sapaly bilimge teń qoljetimdilikti qamtamasyz etýdi, ár balanyń jeke qajettilikterin ýaqtyly anyqtaýdy, kedergisiz bilim berý ortasyn damytýdy jáne psıhologııalyq-pedagogıkalyq qoldaýdyń sapasyn arttyrýdy kózdeıdi.
Balany qoldaý onyń qajettilikterin erte anyqtaýdan bastalady. Bul jumys balanyń áleýmettenýin, kásibı baǵdarlanýyn jáne derbes ómirge daıyndalýyn da qamtıdy.
Sonymen qatar mınıstrlik keshki mektepterdiń jumysyn uıymdastyrý jáne ınklıýzııany qoldaý kabınetterin damytý máselelerin qarastyrýda. Tergeý ızolıatorlarynda ustalatyn kámeletke tolmaǵandardyń bilim alý quqyǵyn qamtamasyz etý máselesi de qarastyrylýda. Balalardyń qaýipsizdigin arttyrý úshin SMS-habarlama júıesin engizý múmkindigi zerdelenýde.
Aıta ketelik erekshe balalarǵa arnalǵan jańa mektepter 20 óńirde salynatyny týraly jazǵan edik.
