Inklıýzıvti bilim berý: Mektepterdiń 86%-dan astamy qamtylǵan

ASTANA. KAZINFORM – QR Oqý-aǵartý mınıstrligimen Bilim berýdi damytýdyń 2023-2029 jyldarǵa arnalǵan tujyrymdamasyna sáıkes elimizde ınklıýzıvti bilim berýdi damytý boıynsha jumystar júrgizilip jatyr. Bul týraly vedomstvonyń baspasóz qyzmeti málimdedi. 

Halyqaralyq balalardy qorǵaý kúni qarsańynda Aqmola oblysynyń tórt aýdanynda ınklıýzıvti bilim berýdi qoldaý kabınetteri ashyldy. Atap aıtqanda Býrabaı, Bulandy, Sandyqtaý jáne Jaqsy aýdandary.

Inklıýzıvti bilim berýdi qoldaý kabınetteriniń negizgi maqsaty – erekshe bilim berýdi qajet etetin balalarǵa oqý kezinde psıhologııalyq-pedagogıkalyq qoldaý kórsetý.

«QR Oqý-aǵartý mınıstrligi ınklıýzıvti bilim berýdi damytýǵa basymdyq berýde. Búgingi tańda jalpy bilim berý mektepteriniń 86%-dan astamynda qazirdiń ózinde ınklıýzıvti bilim berý boıynsha jaǵdaı jasaldy, 9,7 myń arnaıy pedagog psıhologııalyq-pedagogıkalyq súıemeldeý júrgizýde. Sondaı-aq 2,5 myńnan astam pedagog-assıstent engizildi, olar bilim alýshylarǵa qoldaý bildirýde mańyzdy ról atqarady», - deıdi ınklıýzıvti jáne arnaıy bilim berý departamentiniń dırektory Laýra Býtabaeva.

Qazirgi ýaqytta elimizde mektepter janynan 1051 ınklıýzıvti bilim berýdi qoldaý kabıneti jáne 22 resýrstyq keńes berý ortalyǵy jumys jasaýda. Bul sharalar barlyq balaǵa qoljetimdi jáne ınklıýzıvti bilim berý ortasyn qurýǵa baǵyttalǵan.