Ingýshetııanyń tuńǵysh prezıdenti Aýshev Qazaqstanǵa jer aýdarylǵan kezderdi eske aldy
«Sheshen-ıngýsh xalqyn deportatsııalaý kezi bizge óte aýyr tıgeni ras. Biraq qonaqjaı qazaq xalqy, ózderi bir túıir nandy bólisip otyrsa da, baryn berdi. Biz ony esh esten shyǵarmaımyz. Ony bizdiń balalarymyz da, nemerelerimiz de biledi, aldaǵy urpaqtar da jadynda saqtap qalady. Qazaqstan biz úshin týǵan jerimizge aınaldy. Qazirgi ýaqytta Qazaqstan qarqyndy damyp kele jatqan tegeýrindi memleketke aınaldy. 80-90 jyldardaǵy Qazaqstan men búgingi Qazaqstannyń arasy jer men kókteı. Men Astanada da, Almatyda da jıi bolamyn. Osy 25 jyl ishinde Qazaqstan qatty ózgerdi. Ekonomıkasy qaryshtaı tústi», - dep atap ótti ol Astanada Elbasy Nursultan Nazarbaevtyń qatysýymen ótip jatqan Qazaqstan xalqy Assambleıasy etnomádenı birlestikteriniń «Beıbitshilik pen kelisimniń 25 jyly» festıvalinde.
Sonymen qatar Aýshev Qazaqstannyń táýelsizdik jyldarynda memlekettiń damýyna úlken úles qosqan Nazarbaevtyń eren eńbegin joǵary baǵalady.
«Árıne, eń úlken eńbek Prezıdent Nursultan Nazarbaevtyń enshisinde. Qıyn zamanda barsha xalyqty jumyldyryp, tutas eldiń basqarýyn óz moınyna aldy. 1991 jyly burynǵy Keńes Odaǵy memleketterinde ultaralyq arazdyǵy joq el joq edi. Halyq pen etnostar arasynda qandy qaqtyǵystar oryn alyp jatty. Biraq bir shańyraqta ult pen ulystardy bárinen kóp toptastyrǵan Qazaqstanda beıbitshilik boldy. Osy 25 jyldy tatý-tátti ómir keshken Qazaqstan xalqy baqytty ýaqytty bastan ótkerdi. Qazaqstandy barsha álem biledi, oǵan senedi, onyń Kóshbasshysyna senedi. Nursultan Ábishuly qolǵa alyp otyrǵan isteriniń taǵy bir úlken mıssııasy - yqpaldastyq. Nazarbaev TMD elderin qyzǵyshtaı qorǵap kele jatqan 29-shy panfılovshy dep beker aıtpaıdy», - dedi Aýshev.
