Ingýshetııada lańkestik áreketter oryn aldy: qurbandar bar
ASTANA. Sáýirdiń 5-i. QazAqparat - Ingýshetııanyń Qarabulaq qalasynda búgin tańerteń lańkestik áreket jasaldy. Qalalyq ishki ister bólimi ǵımaratynyń janynda jankeshti-lańkes ózin-ózi jaryp jiberdi.
Oqıǵa saldarynan 2 mıltsıoner qaza tapty, dep habarlaıdy RBK agenttigi
Máskeý ýaqyty boıynsha saǵat 08.20-da shamasynda qalalyq ishki ister bóliminiń aýmaǵyna mılıtsııa avtokóligi kirip bara jatqan kezde belgisiz bireý jarylǵysh qurylǵyny iske qosqan. Keıinnen anyqtalǵandaı, bombany jankeshti jarǵan bolyp shyqty. Ol jeke quram sapqa turyp jatqan ishki ister bóliminiń aýlasyna kirmek bolǵan, biraq kireberistegi avtoturaqta ony mılıtsıonerler qujatyn tekserý úshin toqtatqan. Dál osy kezde ol bombany iske qosqan.
Osy oqıǵadan keıin, birazdan soń mılıtsııa bóliminiń janynda turǵan «Jıgýlı avtokóliginde taǵy bir bomba jarylǵan. Birinshi jarylysqa sebepker bolǵan jankeshti oqıǵa ornyna osy kólikpen kelgen degen paıymdaý aıtylýda. Bul jarylystyń saldarynan eshkim opat bolǵan joq, tergeýshilerdiń bireýi jeńil jaraqat alǵan.
