Infraqurylymdyq derekterdiń geoportalyn jasaýǵa drondar paıdalanylady – QR IIDM

NUR-SULTAN. QazAqparat - QR Indýstrııa jáne ınfraqurylymdyq damý mınıstrligi Bas jospardyń jáne egjeı-tegjeıli jospardyń qurylys salýshylar úshin ǵana emes, halyq úshin de qoljetimdiligin qamtamasyz etetin jańa qala qurylysy júıesin ázirleýde, dep habarlaıdy QazAqparat mınıstrliktiń Telegram kanalyna silteme jasap.

Tikushaq jáne ushaq túrindegi drondardy eldimekenderdiń elektrondyq tsıfrlyq kartalaryn jasaý jáne ınfraqurylymdyq derekterdiń biryńǵaı geoportalyn ózektendirý úshin Memqalakadastr mamandary paıdalanady.

Biryńǵaı geoportal kiretin memlekettik qala qurylysy kadastrynyń avtomattandyrylǵan aqparattyq júıesi (MQK AAJ) sáýlet, qala qurylysy jáne qurylys qyzmetin sýmen, káriz, sý burý, elektrmen jabdyqtaý, baılanys, gazben, jylýmen jabdyqtaý, kósheni jaryqtandyrý, jol qozǵalysyn uıymdastyrý jáne basqa da obektiler jelileri boıynsha tsıfrlyq derektermen qamtamasyz etedi.

«Qazirgi ýaqytta ınjenerlik ınfraqurylymdy tsıfrlandyrý jumystary ushqyshsyz ushý apparattarymen aerofototúsirilim kezinde alynǵan jerdi qashyqtan zondtaý materıaldaryn paıdalanyp júrgizilýde», - dedi «Memqalakadastr» RMK bas dırektory Turlybek Musabaev.

Drondardyń kómegimen júrgizilgen aerotúsirilim ǵımarattar men qurylystardyń, ınjenerlik ınfraqurylymnyń, abattandyrý obektileriniń keńistik jaǵdaıyn barynsha dáldikpen anyqtaýǵa múmkindik beredi. Tikushaq túrindegi ushqyshsyz apparattar (kvadrokopterler) tyǵyz keńistikterde, al ushaq túrinde - qysqa ýaqyt aralyǵynda úlken aýmaqtardy fototúsirýmen qamtý qajet kezde paıdalanylady.

Alynǵan fotomaterıaldardyń negizinde naqty keńistiktik geografııalyq baılanysymen elektrondyq tsıfrlyq kartalarǵa arnalǵan ortofotojosparlar qalyptastyrylady.

Qoldanystaǵy, salynyp jatqan (rekonstrýktsııalanyp jatqan), jobalanyp jatqan jerasty jáne jerústi obektileri týraly ózektendirilgen derekter ınjenerlik kommýnıkatsııalardy qosymsha túgendeýden ótkennen keıin Qala kadastry júıesiniń biryńǵaı geoportaly - ashyq kontýryna túsiriledi. Biryńǵaı geoportal tek mamandarǵa ǵana emes, kez kelgen azamatqa qoljetimdi.