Infraqurylymdy jańǵyrtý, jańa obektiler jáne AÓK jobalary: Úkimette Abaı oblysyn damytý máselesi qaraldy

ASTANA. QazAqparat - Úkimette Abaı oblysynyń áleýmettik-ekonomıkalyq damýynyń negizgi jobalaryn júzege asyrý boıynsha sharalar qaraldy. Atap aıtqanda, QR Premer-Mınıstri Álıhan Smaıylovtyń 21 sáýirde aımaqqa jasaǵan jumys saparynyń qorytyndysy boıynsha bergen tapsyrmalaryn oryndaý barysy talqylandy, dep habarlaıdy primeminister.kz.

Ortalyq memlekettik organ basshylary men oblys ákimi óńirdiń jylý jáne sýmen jabdyqtaý jelilerin, Taldyqorǵan – Qalbataý tasjolyn jáne Shar sý qoımasy qurylymdaryn qaıta jańǵyrtý, sondaı-aq Qarakól sý qoımasyn, Ertis ózenindegi kontrregýlıator, qatty turmystyq qaldyqtardyń jańa polıgonyn, Semeı qalasyndaǵy JES-3 salý jáne taǵy basqa qurylystar boıynsha júrgizilip jatqan jumystar týraly baıandady.

Budan bólek, óńirdi áleýmettik mańyzdy azyq-túlik taýarlarymen qamtamasyz etý maqsatynda agroónerkásiptik keshen salasyndaǵy jańa ınvestıtsııalyq jobalardy qoldaý, iri kásiporyndar men jer qoınaýyn paıdalanýshylarynyń shaǵyn jáne orta bıznes beldeýin qurý, «Otbasy banki» AQ arqyly kezekte turǵan azamattardy turǵyn úımen qamtamasyz etý, respýblıkanyń basqa qalalarymen áýe qatynasyn keńeıtý jáne taǵy da basqa máseleler boıynsha aqparat berildi.

Sondaı-aq kásiporyndardy modernızatsııalaý jáne geologııalyq barlaý jumystaryna ınvestıtsııa tartý, Baqty aýylynda qurǵaq port pen logıstıkalyq park qurylysy, Semeıdegi aspaly kópir men joldardy jóndeý jáne jańa energetıkalyq ınfraqurylym, bilim berý, densaýlyq saqtaý, mádenıet jáne sport obektileriniń qurylysy boıynsha josparlar tyńdaldy.

Premer-Mınıstr mınıstrlikter men oblys ákimdigi eń ózekti jobalar men bastamalarǵa basymdyq bere otyryp, birlesken is-sharalardy kezeń-kezeńimen muqııat josparlaýy qajettigin atap ótti.