Infraqurylymdyq jobalardy ınvestıtsııalaýǵa «Báıterek» holdınginen 8 trln teńge bólindi — Úkimet
ASTANA. KAZINFORM — Premer-mınıstr Oljas Bektenovtiń tóraǵalyǵymen «Báıterek» ulttyq basqarýshy holdıngi» AQ dırektorlar keńesiniń otyrysy ótti. Memleket basshysynyń ekonomıkanyń naqty sektoryn qarjylandyrý jónindegi tapsyrmalaryn júzege asyrýǵa nazar aýdaryldy. Bul týraly Úkimettiń baspasóz qyzmeti málim etti.
Dırektorlar keńesiniń músheleri Holdıngtiń bıznesti memlekettik qoldaý quraldarymen qamtýdy arttyrý boıynsha júrgizip jatqan jumystar týraly habardar etildi.
— Bıylǵy úsh aıda ShOB-ty qoldaýǵa baǵyttalǵan jalpy soma 439 mlrd teńgeni qurady, bul ótken jyldyń sáıkes kezeńimen salystyrǵanda 28%-ǵa artyq. Qazaqstannyń damý banki arqyly 292,1 mlrd teńgege 9 ınvestıtsııalyq joba jáne 9 eksporttyq operatsııa qarjylandyryldy. Ónerkásipti damytý qory 94,5 mlrd teńgeni quraıtyn 75 lızıngtik operatsııa men qaryzdar berildi, — delingen habarlamada.
Agroónerkásip sektoryn damytý boıynsha Prezıdent alǵa qoıǵan mindetterdi júzege asyrý maqsatynda 3,2 myńnan astam AÓK sýbektisi memlekettik qoldaýmen qamtyldy. Aýyl sharýashylyǵy taýaryn óndirýshiler 233,4 mlrd teńge somasyna qarjylandyryldy, onyń ishinde kóktemgi dala jumystaryna 134,9 mlrd teńge baǵyttaldy. Qabyldanǵan sharalardyń nátıjesinde qazaqstandyq sharýalar 1,2 myńnan astam aýyl sharýashylyǵy tehnıkasy men jabdyqtaryn satyp aldy.
Bıyl iri ónerkásiptik jáne ınfraqurylymdyq jobalardy ınvestıtsııalaýǵa alǵash ret «Báıterek» UBH quraldary arqyly shamamen 8 trln teńge bólinip otyr. Osy sharalardyń nátıjesinde ekonomıkanyń serpindi ósýi jáne jańa jumys oryndaryn ashý kútilip otyr.
— Qazir Holdıng iske asyryp jatqan basym mindetterdiń biri — ekonomıkanyń naqty sektoryn qarjylandyrý. Ekonomıkaǵa, elimizdegi birqatar asa mańyzdy ındýstrııalyq jáne ınfraqurylymdyq jobalardy júzege asyrýǵa josparlanǵan 8 trln teńgeniń ıgerilýi qazirdiń ózinde 2 trln teńgege jaqyndap qaldy. Qurylys maýsymy óziniń belsendi kezeńine endi ǵana engenin eskersek, qarqyn jaman emes. Men «Báıterektiń» barlyq enshiles qurylymdarynyń naqty, úılesimdi jumys isteý qajettiligine nazar aýdarǵym keledi. Bul mindet qazirgi jaǵdaıda ońaı emes, biraq biz óz mindettemelerimizdi oryndaımyz. Holdıng, memleket kapıtaldandyrý boıynsha óz mindettemelerin oryndaǵan jaǵdaıda, ekonomıkany 8 trln teńgege qarjylandyrý jónindegi mindetti oryndaıtynyna senimdimin, — dep atap ótti Oljas Bektenov.
Ulttyq ekonomıka jáne Qarjy mınıstrlikterine Holdıngtiń ýaqtyly kapıtaldandyrylýyn qamtamasyz etý tapsyryldy.
— Turǵyn úı saıasatyn iske asyrý boıynsha júrgizilip jatqan jumystarǵa erekshe nazar aýdaryldy. Máselen, osy jyldyń 1 toqsanynda 11,8 myńnan astam qazaqstandyq otbasy turǵyn úımen qamtamasyz etildi. «Otbasy bank» AQ 225,2 mlrd teńge somasyna qaryz berdi, «Qazaqstandyq turǵyn úı kompanııasy» 27,6 mlrd teńgege kepildik berdi, — dep habarlady Úkimetten.
Dırektorlar keńesi otyrysynyń qorytyndysy boıynsha nátıjelilikti ári qaraı arttyrý maqsatynda Holdıngtiń ınvestıtsııalyq saıasatyn, sondaı-aq uıymdastyrýshylyq jáne qarjylyq baǵyttardy jetildirý boıynsha birqatar qujat qabyldandy.
Eske sala keteıik, buǵan deıin Úkimet qaıtarylǵan aktıvter esebinen dárigerlik ambýlatorııalardyń qurylysy bastalatynyn habarlaǵan bolatyn.