Infraqurylymdyq damý qory esebinen qandaı jobalar qarjylandyrylatyny belgili boldy
ASTANA. KAZINFORM — Ulttyq ekonomıka mınıstriniń buıryǵymen Infraqurylymdyq damý qorynyń qarajaty esebinen qarjylandyrylatyn ınvestıtsııalyq jobalardy irikteý qaǵıdalary men ólshemsharttary bekitildi.
Qujatqa sáıkes, ortalyq memlekettik organdar nemese jergilikti atqarýshy organdar jobalardy belgilengen ólshemsharttarǵa saı bolǵan jaǵdaıda ázirleıdi.
Jobalar tómendegi krıterıılerdiń keminde birine sáıkes kelýi tıis:
• memlekettik ınvestıtsııalyq jobalardy josparlaý jáne iske asyrý qaǵıdalarynda aıqyndalǵan asa mańyzdy obektiler men jalpyulttyq mańyzy bar jobalar;
• eldi mekenderge arnalǵan óńirlik standarttar júıesine sáıkes keletin jobalar;
• Prezıdenttiń nemese Premer-mınıstrdiń tikeleı tapsyrmasy boıynsha iske asyrylatyn obektiler;
• respýblıkalyq memlekettik ınvestıtsııalyq jobalar;
• densaýlyq saqtaý obektileri (feldsherlik-akýsherlik pýnktterdi, dárigerlik ambýlatorııalar men medıtsınalyq pýnktterdi qospaǵanda);
• halyqtyń júrip-turýy shekteýli toptaryna arnalǵan áleýmettik nysandar (arnaıy mektepter, ınklıýzıvti sport ortalyqtary, múgedektigi bar adamdarǵa arnalǵan ońaltý ortalyqtary);
• iri aglomeratsııalardyń jobalary;
• oblys ortalyqtarynda, respýblıkalyq mańyzy bar qalalarda jáne astanada obektilerdi salý jáne rekonstrýktsııalaý;
• temirjol ótkelderi men kópir qurylystary, onyń ishinde kósheler quramyndaǵy nysandar;
• sý burý júıeleriniń obektileri jáne aýyz sý óndirý kólemin táýligine 100 myń tekshe metrge deıin arttyrýǵa baǵyttalǵan tuşytý zaýyttaryn jańǵyrtý jobalary;
• mádenıet jáne sport obektileri.
Ortalyq memlekettik jáne jergilikti atqarýshy organdar jobalardy bekitilgen quny sheginde iske asyrady. Sonymen birge, qor qarajaty esebinen qarjylandyrylatyn jobalardyń qunyn qymbattatýǵa jol berilmeıdi.
Buıryq 29 tamyzda kúshine enedi.
Aıta keteıik, buǵan deıin Toqaev Úkimetke áleýmettik jáne ınfraqurylymdyq nysandar salýdy jedeldetýdi tapsyrǵanyn jazǵanbyz.
