INFOSTRADA: Qazaqstan Rıoda alty altyn alady
ASTANA. QazAqparat - Álemdik Infostrada zertteý ortalyǵy 2016 jyly Rıoda ótetin Olımpıada oıyndarynda qaı el qansha medal alatynyna boljam jasady.
Bul týraly alaman.kz habarlaıdy.
Agenttiktiń boljaýynsha, Qazaqstan Rıo Olımpıadasynda 6 altyn, 4 kúmis, 3 qola medalmen jalpy esepte 14-oryn alýy múmkin.
Uıym Rıoda Birjan Jaqyp, Jánibek Álimhanuly, Danııar Eleýsinov jáne Mereı Aqshalov syndy boksshylar chempıon atanady degen. Alaıda tizimdegi boksshylardyń ishinde Mereı Aqshalov sporttan ketkeni belgili. Sondaı-aq olar aýyr atletter - Zúlfııa Chınshanlo men Vladımır Sedov altyn alady dep boljaıdy.
«Beıjiń men Londonda chempıon atanǵan aýyr atlet Ilıa Ilın men aýyr atletıkadan alǵash álem chempıony atanǵan qazaq Jasulan Qydyrbaev, boksshylar Ádilbek Nııazymbetov pen Ivan Dychko kúmis alady», - deıdi zertteý ortalyǵy.
Úsh qolany Jazıra Japparqul (aýyr atletıka), Berik Ábdirahmanov ( boks) jáne Qaırat Eralıevke (boks) «beripti».
2012 jyly London Olımpıadasy aldynda USA Today basylymy «Qazaqstan 2012 jyly 5 altyn alady» dep boljaǵan. Nátıjesinde Qazaqstan jeti altynmen jalpy esepte 12-oryndy ıelengen edi.
Infostrada agenttiginiń boljamynda myna elder Rıoda úzdik ondyqqa enedi:
1. AQSh- 97 (47 altyn, 21 kúmis, 29 qola)
2. Qytaı - 76 (28, 28, 20)
3. Reseı - 74 (25, 25, 24)
4. Frantsııa - 47 (18, 12, 17)
5. Germanııa - 55 (16, 16, 23)
6. Avstralııa - 42 (14, 16, 12)
7. Ulybrıtanııa - 45 (10, 16, 19)
8. Brazılııa - 27 (10, 14, 3)
9. Jańa Zelandııa - 18 (10, 6, 2)
10. Vengrııa - 17 (10, 2, 5)
