Informatıka sabaǵy 1-2-synyptardan bastap engiziledi
ASTANA. QazAqparat - Bıyl «Informatıka» páni 3-shi synyptan bastalady. Bul týraly Ortalyq kommýnıkatsııalar qyzmetinde QR Bilim jáne ǵylym mınıstri Erlan Saǵadıev málim etti, dep habarlaıdy QazAqparat.
«Osy jyly 1-11 synyptarǵa arnalǵan jańa memlekettik bilim berý standarttary, jańa tıptik oqý josparlary (TÝP) men oqý baǵdarlamalary bekitildi. Endi tek qana bir tıptik oqý jospary bolmaıdy, birneshe TÝP-tardy daıyndap bekittik. Mekteptiń ózine keletin jospar boıynsha jumys jasaýyna múmkindik berdik. Barlyq mektepterge osy TÝP-tar arqyly akademııalyq derbestik berýdi durys dep esepteımiz. Bul jerde ár mekteptiń bilýi qajet másele -qaı TÝP-pen jumys isteıtinin mektep ózi sheshedi. Jalpy mekteptermen qatar, gımnazııa, lıtseıler, daryndy balalarǵa arnalǵan mektepter úshin de, keshki mektep úshin de oqý josparlary muǵalimder usynysy eskerilip jasaldy», - dedi mınıstr.
Sonymen qatar E. Saǵadıev «Rýhanı jańǵyrý» baǵdarlamasy aıasynda 5-7-shi synyptarǵa «Ólketaný» kýrsy bıyl alǵash ret engiziletinin atap ótti. Oqýlyqtar mazmuny óńirlerde qurylǵan avtorlyq toptarmen birge jasaldy. Búgingi kúni oqýlyqtar daıyn.
«Bıyl «Informatıka» páni 3-shi synyptan bastalady. «Tsıfrlyq Qazaqstan» baǵdarlamasynyń aıasynda ınformatıka sabaǵy kelesi jyldan 1-2-shi synyptardan engiziledi. Olardyń baǵdarlamalary daıyndalýda. Tsıfrlyq bilim berý resýrstary belsendi qoldanylýda. Ár pán boıynsha resýrstar mektepterge 100 paıyzǵa jetkizildi, endi muǵalimder ony tıimdi paıdalana bilýi qajet», - dedi E. Saǵadıev.
