Informatıka - ekonomıkanyń barlyq salasynda utymdy sheshimder qabyldaý kózi - D. Mamınov
ALMATY. QazAqparat - Informatıka - ekonomıkanyń barlyq salasynda utymdy sheshimder qabyldaý kózi. Bul týraly «QazAqparat» tilshisine bergen suhbatynda Almatyda ınformatıka páninen oqýshylar arasynda ótken XXVII halyqaralyq olımpıadanyń qola júldegeri, Almatydaǵy Qazaq-túrik lıtseıiniń túlegi, 18 jastaǵy Danııar Mamınov málim etti.
Onyń aıtýynsha, qazirgi tańda ekonomıkanyń barlyq salasynda óndiristik úderister avtomattandyrylyp jatyr.
«Ómirde ınformatıkanyń alar orny erekshe. Informatıka - ekonomıkanyń barlyq salasynda utymdy sheshimder qabyldaý kózi. Sonyń arqasynda óndiristi tıimdi uıymdastyrýǵa bolady. Informatıka - ámbebap kómekshi. Men bul salaǵa kezdeısoq keldim desem de bolady. Al qazir shynynda da jolym boldy dep sanaımyn. Óıtkeni, ınformatıkamen aınalysyp júrgenime rızamyn. Mundaı deńgeıdegi jarysqa birinshi ret qatysýym. Altyn medaldan úmittenip edim. Biraq qolaǵa ǵana qol jetkizdim. Buǵan ókinbeımin. Eń bastysy, tájirıbe jınaqtadym», - dedi D. Mamınov.
Sonymen qatar, Danııar Olımpıadanyń óte joǵary deńgeıde ótkendigin jáne sheteldik áriptesterine Almaty qalasynyń qatty unaǵandyǵyn jetkizdi.
«Olarǵa jarysty uıymdastyrý deńgeıi de, Almaty qalasy da qatty unady. Olımpıada aıasynda tamasha mádenı sharalar ótkizildi. Oqýshylar tipti Almaty oblysynda ornalasqan Túrgen shatqalyna da baryp qaıtty. Sheteldik áriptesterime unaǵanyna men de óte qýanyshtymyn», - dedi D. Mamınov.
