Inflıatsııanyń jedeldeýi halyqtyń naqty tabysyn qunsyzdandyryp otyr – Ulttyq bank
ASTANA. KAZINFORM – Halyqtyń naqty tabysy tómendep, al naqty jalaqy deńgeıi ózgerissiz qalyp otyr. Bul týraly Ulttyq bank tóraǵasy Tımýr Súleımenov aıtty.
- Inflıatsııa – búgin memlekettik saıasattyń kún tártibindegi eń mańyzdy másele. Qarqyndy damyp jatqan ekonomıka jaǵdaıynda ınflıatsııanyń jedeldeýi halyqtyń naqty tabysyn qunsyzdandyryp otyr. Ókinishke qaraı, halyqtyń naqty tabysy tómendep, al naqty jalaqy deńgeıi ózgerissiz qalǵan. Sońǵy 2,5 jyldy alyp qaraǵanda, shilde aıynda tabys maksımaldy túrde tómendengeni baıqaldy. Árıne, bul úrdis joǵary ınflıatsııa aıasynda qalyp otyr, - dedi ol.
Tımýr Súleımenov sol sebepti, ınflıatsııany tómendetý boıynsha keshendi jumys Ulttyq bank pen Úkimet úshin negizgi mindet bolyp qala beretinin aıtady.
- Inflıatsııa deńgeıin baqylaý jáne tómendetý boıynsha jańartylǵan sharalar keshenin ázirleý barysynda Úkimetpen birlesip, tarıftik saıasat parametrlerin túzetý baǵytynda tyǵyz balanys ornatýdy jalǵastyramyz. Aqsha-kredıt jáne makroprýdentsııalyq saıasat boıynsha qosymsha sharalardy iske asyrýdy da jalǵastyramyz. Birinshi – 2026 jylǵy qyrkúıekke deıingi 3 kezeńnen turatyn josparǵa sáıkes, eń tómengi rezervtik talaptardy kóterý. Bul sharalar aqsha-kredıt saıasaty quraldary boıynsha syıaqy tóleýge arnalǵan aqsha emıssııasyn qysqartyp, aınalymdaǵy artyq aqshany azaıtý arqyly ınflıatsııaǵa qarsy saıasattyń tıimdiligin arttyrady. Ekinshi – altyn-valıýta operatsııalaryn teńestirý. Osy shara aıasynda bıylǵy 9 aıdyń ishinde 2,3 trln teńge kóleminde ótimdilik alyndy. Jyl sońyna deıin qosymsha 1,4 trln teńge alý josparlanyp otyr. Bul emıssııalyq jáne ınflıatsııalyq áserdi tómendetip, jańa ótimdiliktiń paıda bolýyna jol bermeıdi, - dedi ol.
Onyń aıtýynsha, úshinshiden, tutynýshylyq kredıtteý naryǵyn salqyndatý boıynsha belsendi jumys júrip jatyr.
- Jeke tulǵalardyń nesıelerine qatysty sektoraldy kontrtsıkldik kapıtal býferi engizildi. 2026 jylǵy 1 sáýirden bastap bankter jeke tulǵalar portfeliniń táýekelmen ólshengen aktıvteriniń 2 paıyzy mólsherinde qosymsha kapıtal býferin ustap otyrýy tıis. Ol aǵymdaǵy derekter boıynsha 463,5 mlrd teńge shamasynda baǵalanady, - dedi UB tóraǵasy.
Buǵan deıin Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18 paıyz deńgeıinde belgileý týraly sheshim qabyldaǵan edi.