Inflıatsııanyń yryqqa kóngenin qalaı bilemiz
Ulttyq bank tóraǵasy Tımýr Súleımenov elimizdegi ınflıatsııanyń yryqqa kóný belgisin atady, dep habarlaıdy Kazinform.
«Inflıatsııa eń birinshi kedeı adamdarǵa soqqy bolady. Bul — tek bizdiń ǵana baıqaǵanymyz emes. Muny barlyq ekonomıst biledi. Bul — ekonomıkalyq fakt. Aıtalyq, sizdiń jalaqyńyz 1 mln teńge bolyp, onyń 150 myń teńgesin kúndelikti tirshiligińizge jumsaısyz. Ol tabysyńyzdyń 15 paıyzyn quraıdy. Al eger jalaqyńyz 300 myń teńge bolyp, 150 myń teńgesin jumsasańyz, onda ol kirisińizdiń 50 paıyzyna teń. Baǵanyń kez kelgen kóterilýi jalaqysy joǵary adamǵa qaraǵanda sizge qatty áser etedi. Bul — ekonomıkalyq saıasattyń aksıomasy. Sondyqtan da ınflıatsııanyń óte kóp ekonomıkalyq faktory bar dep sanaımyz. Sol sebepti qoldanystaǵy saıasatty ustanýǵa tyrysamyz. Biz ınflıatsııany dáliz aıasyna „syıǵyzýymyz“ kerek», — dedi Tımýr Súleımenov Ulttyq bankte ótken brıfıngte.
Onyń atap ótýinshe, Ulttyq bank 2025 jyldyń sońyna deıin ınflıatsııany 5 paıyzǵa deıin tómendetýdi josparlap otyr.
«Bul — ekonomıkalyq ósim men ınflıatsııa arasyndaǵy teńgerim. Biz ınflıatsııa ekonomıkalyq ósimge kedergi keltirmeıtindeı, sonymen qatar qaltaǵa aýyr salmaq salmaıtyndaı bolǵanyn qalaımyz. Bul ınvestıtsııany josparlaýǵa múmkindik berer edi, sheteldik jáne otandyq ınvestorlar úshin de óte mańyzdy. Sol arqyly qarapaıym qazaqstandyqtardyń óz shyǵynyn josparlaýǵa, tutyný men jınaqtaý arasyndaǵy teńgerimdi saqtaýǵa múmkindik alady. 5 paıyz bolǵanda bul bizge ınflıatsııanyń beti qaıtqanynan belgi beredi», — dedi Tımýr Súleımenov.
