Inflıatsııany ýshyqtyratyn «Báıterektiń» nesıeleri emes, bankterdiń halyqqa bergen turmystyq kredıtteri — UEM
ASTANA. KAZINFORM — Ulttyq ekonomıka mınıstriniń orynbasary Arman Qasenov Senattaǵy Úkimet saǵatynda «Báıterek» holdınginiń bızneske beretin nesıesi ınflıatsııany ýshyqtyryp jatqany týraly synǵa jaýap berdi.
— Byltyr 2025 jyldyń qyrkúıeginde ınflıatsııa deńgeıi 12,9% bolyp, sharyqtaý shegine jetken bolatyn. Sodan beri beti qaıtyp keledi. Bıylǵy sáýirdiń qorytyndysy boıynsha ınflıatsııa 10,6%-ǵa deıin tústi. Jyl aıaǵyna deıin 10%-dan tómen bolady dep kútip otyrmyz. Inflıatsııa áser etetin faktordyń biri — nesıelendirý. Qazaqstandaǵy ınflıatsııanyń negizgi kózi kredıtteýdiń ósýi, ulttyq valıýta baǵamy, álem boıynsha azyq-túlik baǵasynyń ósýi, tarıfter men Salyq kodeksi boldy. Iá, kredıtteý ınflıatsııanyń negizgi kóziniń biri. Biraq dál «Báıterektiń» yqpaly óte asyra baǵalanǵan, — dedi ol.
Vıtse-mınıstr bul sóziniń qısynyn bankterdiń turmystyq nesıelerin mysalǵa ala otyryp túsindirdi.
— Qazir «Báıterektiń» 8 trln teńge ıgergeni aıtylyp júr. Bul shyn. Biraq osy qarajattyń kóp bóligi jańartylatyn negizge ıgerildi. ıAǵnı bul qarajat nesıe retinde berilgen boıda ótelip otyrdy. Osynyń arqasynda «Báıterektiń» kredıt portfeli artqan joq. Holdıngtiń kredıt portfeliniń ósimi 4 trln teńgeden asqan joq. Onyń ózinde «Otbasy bank» arqyly beriletin ıpotekanyń eseptemesek, tikeleı bızneske berilgen kredıt kólemi 2,2 trln teńgege ǵana ósken. Bul bank sektorynyń 4,1 trln teńge ósken turmystyq nesıesinen áldeqaıda tómen, — dedi ol.
Arman Qasenovtiń aıtýynsha, «Báıterek» kóbinese sheteldik tehnologııalar men qondyrǵylardy satyp alý jobalaryn nesıelendiredi.
— Sonda 2,1 trln teńge ósimniń jartysyna jýyǵy osy maqsatqa ketti. Bul el ishindegi suranysty arttyrǵan joq. Sáıkesinshe ınflıatsııa qysymyn arttyrǵan joq. Sonda «Báıterektiń» bıznesti nesıelendirý arqyly ınflıatsııaǵa tıgizetin áseri 1 trln teńge ǵana. Bul sonsha bir ınflıatsııalyq faktor bolyp eseptelmeıdi. Jalpy kredıtteý ınflıatsııanyń negizgi faktorlarynyń biri, biraq, naqty «Báıterek» sebepker deýge kelmeıdi, — dedi vıtse-mınıstr.
Buǵan deıin «Báıterek» ekonomıka salalaryn qoldaýǵa 8 trln teńge qarjy bóletini aıtylǵan bolatyn.
