Inflıatsııany tómendetý úshin qatań aqsha-kredıt sharttaryn saqtaý qajet — UB
ASTANA. KAZINFORM — 18 paıyzdyq bazalyq mólsherleme birinshi jartyjyldyqta saqtalady. Bul týraly Ulttyq bank tóraǵasy Tımýr Súleımenov aıtty.
— Ulttyq banktiń Aqsha-kredıt saıasaty komıteti bazalyq mólsherlemeni 18 paıyz deńgeıinde saqtaý týraly sheshim qabyldady. Bul sheshim ınflıatsııanyń aǵymdaǵy dınamıkasyn, onyń faktorlary men táýekelder balansyn eskere otyryp qabyldanyp otyr. 2025 jyldyń qorytyndysy boıynsha ınflıatsııa 12,3 paıyzǵa deıin jedeldedi. Inflıatsııanyń eń joǵary deńgeıi 2025 jyldyń qyrkúıek aıynda qalyptasyp, 12,9 paıyz boldy. Alaıda, qarasha aıymen salystyrǵanda, jeltoqsanda baǵa ósiminiń qarqyny báseńdeı bastady. Bul úrdis, eń aldymen, azyq-túlikke jatpaıtyn taýarlar men qyzmetter naryǵynda baıqaldy. Oǵan ustamdy qatań aqsha-kredıt saıasaty, tarıfterdiń ákimshilik tarapynan tómendeýi jáne ınflıatsııaǵa qarsy basqa sharalar áser etti, — dedi UB tóraǵasy.
Onyń aıtýynsha, dezınflıatsııanyń keıbir belgilerine qaramastan ekonomıkadaǵy baǵa qysymy joǵary bolyp otyr. Azyq-túlik ınflıatsııasy qarqyn alyp, salyq reformasynan jáne qosymsha qun salyǵyndaǵy ózgeristerden halyq pen bıznestiń ınflıatsııalyq kútýleri ósti. Al bazalyq jyldyq ınflıatsııa áli de joǵary deńgeıde qalyp otyr. Osy faktorlar birigip, ınflıatsııanyń turaqty sıpaty men baǵa protsesteriniń ınertsııasyn kórsetti.
— Elde ekonomıkalyq belsendilik joǵary. Halyqtyń tabysy tómendep, tutynýshylyq kredıtteý azaısa da, ishki suranys joǵary deńgeıde saqtalyp otyr. Azyq-túliktiń álemdik baǵasy sońǵy aılarda tómendese de, aldyńǵy jylǵy kórsetkishterdeı joǵary deńgeıde qaldy, al tómendeý qarqyny álsirep keledi. Qazirgi ınflıatsııanyń dınamıkasy, halyqtyń ózgeristerdi kútýi jáne ishki suranys qarqyny ınflıatsııanyń turaqtanýyna qaramastan proınflıatsııalyq faktorlardyń basym ekenin kórsetedi. Proınflıatsııalyq táýekelder basqa faktorlarmen birge QQS mólsherlemesiniń kóterilýi men salyq tóleýshiler sanynyń artýyn kózdeıtin aýqymdy salyq reformasynyń qalaı iske asatynyna da baılanysty. Aldaǵy toqsandarda bıznestiń osy ózgeristerge qalaı beıimdeletinin muqııat baqylaý mańyzdy. Sondaı-aq, birinshi toqsannan keıin qaıta jandanady dep kútilip otyrǵan tarıfter men qaıta qaralǵan baǵalar ınflıatsııaǵa qalaı áser etetinin qadaǵalaý qajet, — dedi ol.
UB basshysynyń paıymynsha, mundaı kezde dezınflıatsııalyq traektorııa turaqty qalyptasty dep aıtýǵa kelmeıdi.
— Inflıatsııany únemi tómendetip otyrý úshin qalypty qatań aqsha-kredıt sharttaryn saqtaý qajet. Úkimetpen birge Birlesken is-qımyl baǵdarlamasyndaǵy jáne Inflıatsııany baqylaý men tómendetý sharalarynyń keshenindegi ınflıatsııaǵa qarsy sharalardy júrgizgen durys. Aqsha-kredıt saıasatynyń baǵyty ózgermeıdi: bazalyq mólsherleme 2026 jyldyń birinshi jartysynda joǵary yqtımaldyqpen qazirgi deńgeıinde saqtalady. Ol ınflıatsııany tómendetý jáne onyń turaqty baıaýlaýyn ornyqtyrý úshin qajet, — dedi Tımýr Súleımenov.
Aıta keteıik, búgin Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18% deńgeıinde belgileý týraly sheshim qabyldady.