Inflıatsııamen kúres júıeli reforma talap etedi – sarapshy

ASTANA. KAZINFORM – Prezıdent Qasym-Jomart Toqaev búgingi Joldaýynda elimizdegi basty másele retinde joǵary ınflıatsııany atap ótti. Memleket basshysy bul halyq tabysy men ekonomıkalyq ósimdi joıyp jatqanyn aıtyp, Úkimet pen Ulttyq banktiń birlesip, naqty ári tıimdi áreket etýi qajet ekenin jetkizdi.

Ekonomıst Rasýl Rysmambetov atalǵan máselege qatysty óz pikirin bildirdi.

– Iá, ınflıatsııa – negizgi problemalardyń biri. Biraq eń basty másele – ekonomıkamyzdyń kenje qalýy, dıversıfıkatsııanyń tómendigi jáne ınfraqurylym men kommýnaldyq jelilerdiń tozýy. Sondyqtan ınfraqurylymdy jóndeý, qalpyna keltirý jáne jańasyn salýǵa ınvestıtsııa tartý óte mańyzdy. Máselen, qys kezinde Almatydaǵy JEO-lardyń biri isten shyqsa, ınflıatsııa máselesi ekinshi kezekke ysyrylady. Ekibastuz mysaly – sonyń aıǵaǵy, – dedi sarapshy.

Onyń aıtýynsha, ınflıatsııany tek shekteý arqyly emes, júıeli sheshimder arqyly tómendetý kerek.

– Prezıdent aıtqan beıdástúrli tásilderdi qoldaný qajet. Sonyń biri – tsıfrlyq teńgeni engizý. Birinshiden, bul bıýdjettik qarajattyń maqsatty jumsalýyna sep bolady. Ekinshiden, memlekettik shyǵystarǵa qatań baqylaý engiziledi. Úshinshiden, shuǵyl reformalar júrgizilýi kerek. Inflıatsııany shekteý arqyly ýaqyt utýǵa bolady, biraq bul – uzaqmerzimdi sheshim emes. Tabıǵı túrde ınflıatsııany tómendetetin faktorlar bolýy tıis. Ol úshin ınfraqurylymdyq jobalar qajet, – dedi ol.

Sarapshy sondaı-aq Úkimet pen Ulttyq bank arasyndaǵy tıimdi kommýnıkatsııanyń mańyzdylyǵyn atap ótti.

– Úkimet pen Ulttyq bank buǵan deıin birlesken málimdemeler jasaıtynyn aıtqan. Menińshe, olar aıyna kem degende bir ret halyqqa ashyq aqparat berip otyrýy tıis. Qansha qarajat jumsaldy, ne úshin jumsaldy, qandaı nátıje beredi – bárin naqty túsindirý mańyzdy. Qoǵammen baılanys – basty qural, – dedi Rasýl Rysmambetov.

Eske salaı keteıik, Elimizde ınflıatsııanyń ósimi 12,2% quraıtynyn jazǵanbyz.