Inflıatsııamen kúres: Ulttyq bank birqatar shara qabyldady

ASTANA. KAZINFORM — Ulttyq bank tóraǵasy Tımýr Súleımenov turaqty qarjylyq saıasat baǵytynda jumys jalǵasatynyn málim etti.

— Ulttyq bank makroekonomıkalyq jáne qarjylyq turaqtylyqty qamtamasyz etý boıynsha jumysty jalǵastyrady. Inflıatsııanyń ósý táýekelin azaıtý úshin dezınflıatsııalyq saıasatty júrgizemiz. Aqsha-kredıt saıasaty quraldarynan bólek qosymsha sharalar qabyldanady, — dedi Tımýr Súleımenov Úkimet otyrysynda.

Ulttyq bank tóraǵasy málim etkendeı, ınflıatsııamen kúreste kelesi sharalar qarastyrylǵan: 

• Altyn satyp alý sheńberinde valıýtalyq operatsııalardy teńdestirý jalǵasady; 
• Jeke tulǵalardyń nesıeleri boıynsha kontrtsıkldik kapıtal býferin engizý týraly sheshim qabyldandy; 
• Bankter úshin mindetti rezervterdiń eń tómengi talaptaryn arttyrý jumysy pysyqtalyp jatyr; 
• Aktıvterdi basqarý aıasynda Ulttyq qor men Biryńǵaı jınaqtaýshy zeınetaqy qorynyń portfelinde joǵary kiristilikke ıe aktıvterdiń úlesin ulǵaıtý; 
• Qarjy sektorynyń tsıfrlyq transformatsııasy jalǵasady. Tsıfrlyq teńgeni masshtabtaý jumysy júrgiziledi. Bul tsıfrlyq teńgeni memlekettik qarjynyń jańa baǵyttarynda engizý múmkindikterin pysyqtaýdy qamtıdy.

Aıta keteıik, bıyl alty aıda eldegi ınflıatsııa 11,8 paıyzdy qurady.