Inflıatsııalyq úderister turaqty tómendep otyr dep aıtýǵa áli erte — UB
ASTANA. KAZINFORM — Azyq-túlik baǵasynyń ósýi qyrkúıekte 0,4 paıyzǵa baıaýlady. Bul týraly Ulttyq bank tóraǵasy Tımýr Súleımenov aıtty.
«Qyrkúıek aıynyń qorytyndysy boıynsha jyldyq ınflıatsııa 8,3 paıyzǵa deıin baıaýlady. Este bolsa, tamyz aıyndaǵy kórsetkish 8,4 paıyz bolǵan edi. Negizinen ol azyq-túlik komponentiniń dezınflıatsııasynan paıda boldy. Azyq-túlik baǵasynyń ósýi tamyzdaǵy 5,5%-ten qyrkúıekte 5,1%-ke deıin baıaýlady. Al azyq-túlikke jatpaıtyn taýarlar baǵasynyń ósýi 7,7%-ten 7,6%-ke deıin báseńdedi. Aqyly qyzmetter ınflıatsııasy shildedegi eń joǵary mánderden (14,5%) tómendep, eki aı qatarynan 13,6% deńgeıinde qalyptasty. Jalpy servıstik ınflıatsııaǵa turǵyn úı kommýnaldyq qyzmetter qunynyń ósýi men birqatar naryqtyq qyzmetterdiń qymbattaýy aıtarlyqtaı úles qosty», — dedi Tımýr Súleımenov.
Onyń dereginshe, qyrkúıekte aılyq ınflıatsııanyń dınamıkasy 0,4-ke deıin tómendedi. Alaıda, ol ortasha tarıhı mánderden birshama joǵary boldy da, 0,3% deńgeıinde qalyptasty. Bazalyq jáne maýsymdyq faktorlardan tazartylǵan ınflıatsııa kórsetkishteri shildede aıtarlyqtaı jedeldegennen keıin baıaýlasa da, kóktem men jaz basyndaǵy eń tómen mánderden áli de joǵary. ıAǵnı, ınflıatsııalyq úderister turaqty tómendep otyr dep aıtýǵa áli erte.
«Sonymen birge, jekelegen kórsetkishter óndiris shyǵyndary esebinen baǵalarǵa qysym artqanyn kórsetedi. Osylaısha, aýyl sharýashylyǵynda, azyq-túlik óndirisinde jáne taýarlar ımportynda baǵalardyń óskeni baıqalyp otyr. Qyrkúıekte halyqtyń ınflıatsııalyq kútýleri 14,1%-ke deıin ósti. Tamyz ol 13,1% bolǵan edi. Respondentter azyq-túlik, aıaqkıim men kıim-keshek jáne kommýnaldyq qyzmetter baǵasynyń óskenin atap ótti. Qarjy naryǵynyń kásibı qatysýshylary bolashaq ınflıatsııaǵa baǵa bergende baıypty ustanymda. Olardyń baǵalaýy boıynsha ol jyl sońyna deıin 8,4%-dy quraıdy. Bul da ósimdi kórsetedi, sebebi buryn olar 8% shamasynda kútken bolatyn», — dedi UB tóraǵasy.
