Inflıatsııalyq ahýal nasharlap tur — Tımýr Súleımenov
ASTANA. KAZINFORM — Inflıatsııanyń shamadan tys ósýin boldyrmaý úshin bazalyq mólsherlemeni edáýir arttyrý qajet boldy. Bul týraly Ulttyq bank tóraǵasy Tımýr Súleımenov aıtty.
— Ulttyq banktiń Aqsha-kredıt saıasaty komıteti bazalyq mólsherlemeni 18 paıyzǵa deıin, ıaǵnı 150 bazıstik tarmaqqa kóterý týraly sheshim qabyldady. Sheshim ınflıatsııanyń qazirgi dınamıkasyn, onyń faktorlary men táýekelder balansyn eskere otyryp qabyldandy. Inflıatsııalyq ahýal nasharlap tur. Tamyz, qyrkúıek aılarynda jyldyq ınflıatsııa qarqyn alyp, 12,9 paıyzǵa jetti. Inflıatsııanyń barlyq komponenti ósip jatyr. Bul baǵalarǵa bir sátte ishki jáne syrtqy birneshe faktordan qysym kórsetilip jatqanyn bildiredi. Inflıatsııanyń ósýine negizgi úles qosyp otyrǵan faktor — azyq-túlik pen aqyly qyzmetterdiń qymbattaýy. Aılyq ınflıatsııa jáne onyń turaqty bóligi aıtarlyqtaı jedeldep keledi. Inflıatsııalyq kútýler de joǵary bolyp qalyp otyr, — dedi ol.
Onyń aıtýynsha, bıyl 8 aıda ekonomıka 6,5 paıyz ósip, 14 jyldaǵy rekordtyq kórsetkishke jetti. Fıskaldyq jáne kvazıfıskaldyq qarajattyń bólinýi suranystyń turaqty bolýyn qamtamasyz etip otyr. Bul suranys pen usynys arasyndaǵy alshaqtyqtyń ósýine ákelip, baǵaǵa qysym kórsetip tur.
— Azyq-túliktiń de álemde baǵasy ósip, ınflıatsııanyń ımporttyq bóligin kúsheıtti. Inflıatsııanyń jedeldeýi, ınflıatsııalyq kútýlerdiń joǵary bolýy jáne aıyrbastaý baǵamynyń álsireýi jıyntyq aqsha-kredıt sharttarynyń jumsarýyna alyp keldi. Qyrkúıekte naqty, ıaǵnı ınflıatsııany esepten alyp tastaǵan jaǵdaıdaǵy bazalyq mólsherleme 3,5 paıyzǵa deıin tómendep, saıasattyń burynǵy qatań deńgeıine saı bolmady. Aqsha-kredıt sharttarynyń ustamdy qatańdyǵyn qaıtarý jáne ınflıatsııanyń shamadan tys ósýin boldyrmaý úshin bazalyq mólsherlemeni edáýir arttyrý qajet boldy. Tamyzdaǵy sheshimdi jarııalaǵan kezde ınflıatsııa qarqyny birshama baıaýlamasa, saıasatty qatańdatý máselesin qarastyramyz degen edik. Endi ınflıatsııany tómendetý úshin osy qaǵıdany iske asyryp jatyrmyz, — dedi UB tóraǵasy.
Tımýr Súleımenovtiń aıtýynsha, bazalyq stavka týraly osy jyldaǵy sońǵy sheshim qarasha aıynda qabyldanady. Sol sheshim qabyldanǵanda ınflıatsııa men basqa da makroekonomıkalyq kórsetkishterdiń jańartylǵan boljamdary eskeriledi.
— Ulttyq bank proınflıatsııalyq jáne dezınflıatsııalyq faktorlar balansyn, ınflıatsııa dınamıkasy men onyń baıaýlaý traektorııasyn jan-jaqty baǵalap otyrady. Saıasattyń qatańdylyq deńgeıi ınflıatsııany turaqtandyrý úshin jetkiliksiz bolǵan jaǵdaıda qosymsha qatańdatý múmkindigin qarastyratyn bolamyz, — dedi ol.
Buǵan deıin Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18 paıyz deńgeıinde belgileý týraly sheshim qabyldaǵan edi.