Inflıatsııaǵa qysym jasaıtyn jekelegen faktorlar saqtalyp otyr – Ulttyq bank
ASTANA. KAZINFORM – Inflıatsııaǵa qysym jasaıtyn jekelegen faktorlar saqtalyp otyr. Bul týraly Ulttyq bank tóraǵasy Tımýr Súleımenov aıtty.
«Syrtqy sektorda jahandyq ınflıatsııanyń baıaýlaý úrdisi baıqalýda. Bul azyq-túlik baǵasynyń oń dınamıkasyna, ortalyq bankterdiń tejeýshi aqsha-kredıt saıasatyna jáne energııa baǵasynyń tómendeýine baılanysty. Degenmen, ınflıatsııaǵa qysym jasaıtyn jekelegen faktorlar da saqtalýda. Qant baǵasynyń qalypty ósýimen qatar dándi daqyldar men et qunynyń arzandaýyna baılanysty álemdegi azyq-túlik baǵasy tómendep keledi. Astyq baǵasynyń tómendeýi mol ónim alý nátıjesinde usynystyń artýyna baılanysty boldy. Sonymen qatar, damyǵan elderde ortalyq bankter mólsherlemelerdi ózgerissiz qaldyrdy. Bul ınflıatsııanyń ornyqty baıaýlaýyna qaraı qaýiptiń bolýyna baılanysty», - dedi Tımýr Súleımenov Ulttyq bankte ótken brıfıngide.
Onyń atap ótýinshe, 2023 jyldyń qorytyndysy boıynsha Eýroodaqtaǵy baǵanyń jyldyq ósýi qarasha aıyndaǵy eń tómengi deńgeıge jetken soń 3,4 paıyzǵa deıin birshama jedeldedi. Targetti 2 paıyzǵa jetkizý úshin Eýropa Ortalyq bankinen uzaq ýaqyt boıy joǵary paıyzdyq mólsherlemelerdi saqtaýdy qajet etedi. Osyǵan uqsas jaǵdaı AQSh-ta da baıqaldy. Onda ınflıatsııa áli de ornyqty.
Federaldy Rezervtik júıe rıtorıkasyna sáıkes, saıasatty jumsartý sharasy bıyl bastalýy múmkin. Qytaıda jyldyq mánde deflıatsııa jalǵasýda. Alaıda, qańtarda aılyq ınflıatsııa kórsetkishinde ósim tirkeldi. Reseıde jyldyq ınflıatsııa 2024 jylǵy qańtar aıynda 7,4 paıyzdy qurady. Negizgi faktor burynǵysynsha joǵary ınflıatsııalyq kútýler men ishki suranystyń ósýi bolyp otyr. 2024 jyly ınflıatsııany ornyna qaıtarý jáne ony Reseı Ortalyq banki targetiniń mańaıynda odan ári turaqtandyrý – qatań aqsha-kredıt sharttaryn uzaq kezeń boıy ustaýdy talap etedi.
«Bizdiń boljamymyz boıynsha álemdik azyq-túlik naryǵynda baǵalar 2024 jyldyń ortasyna deıin birshama kóterilip, keıin turaqtanady jáne birtindep tómendeıdi. Alǵysharttar, bir jaǵynan, tasymaldanatyn taýarlardyń qunyna áser etetin Qyzyl jáne Qara teńizdegi yqtımal logıstıkalyq máselelerdiń táýekelderin bildiredi. Al, basqa jaǵynan, 2024 jylǵy maýsymnyń sońynda halyqaralyq uıymdardyń egin jınaý boljamdary men álemdegi astyq qorlarynyń ósýi boıynsha kútýlerin kórsetedi. Bıyl halyqaralyq uıymdar munaı baǵasy 80 dollarǵa jaqyn deńgeıde turaqtaıdy dep kútedi. Baǵanyń ósýine yqpal etetin negizgi faktorlar: OPEK+tiń munaı óndirisin qysqartý merzimin uzartýy, AQSh-ta munaı óndirý isiniń turaqty ósimi jáne Taıaý Shyǵystaǵy soǵys boıynsha belgisizdik. Osyny eskere otyryp, bazalyq stsenarııde Brent munaıynyń baǵasy 2024-2025 jyly 80 dollar, 2026 jyly 77 dollar deńgeıinde belgilendi», - dedi ol.
