Inflıatsııa týraly pikir qandaı taýarlarǵa baılanysty qalyptastady - Ulttyq bank zertteýi
ALMATY. KAZINFORM – Adamdar ınflıatsııany qandaı taýar men qyzmetterden kóbirek sezinedi? Almatyda osy taqyrypqa arnalǵan zertteý nátıjeleri tanystyryldy.
Halyq ınflıatsııany jalpy ekonomıkalyq kórsetkishtermen emes, kúndelikti satyp alatyn «marker-taýarlar» arqyly sezinedi. QR Ulttyq bankiniń Aqsha-kredıt saıasaty departamenti osyndaı qorytyndyǵa keldi.
Departamenttiń jetekshi mamany Arman Aqpanovtyń aıtýynsha, halyqtyń ınflıatsııa boıynsha boljamy aqsha-kredıt saıasatynyń tıimdiligine jáne baǵa belgileýge tikeleı áser etedi. Zertteý barysynda ınflıatsııa boljamy boıynsha saýalnama derekteri, sondaı-aq baǵalar men makroekonomıkalyq kórsetkishter boıynsha statıstıka paıdalanylǵan.
Taldaý nátıjesine sáıkes, turǵyndar pikirin qalyptastyratyn tizimge jemis-jıdek pen kókónis, qant, ósimdik maıy, nan-toqash ónimderi, jarmalar jáne jumyrtqa engen. Odan bólek janar-jaǵarmaı, kommýnaldyq qyzmetter, oqý aqysy jáne páter jaldaý quny erekshelendi. Zertteý kórsetkendeı, resmı statıstıkaǵa kirmese de, úıdiń baǵasy halyqtyń «bári qymbattap jatyr» degen túısigine qatty áser etedi.
Zertteýdiń taǵy bir qyzyq tusy – adamdar baǵanyń óskenin birden sezip, dabyl qaǵady, biraq baǵa tómendegende ony asa baıqaı bermeıdi. Sondyqtan resmı esepterde ınflıatsııa báseńdegeni habarlansa da, negizgi taýarlardyń baǵasy túspese, jurtshylyq oǵan senbeıdi.
Eske salaıyq, 2025 jylǵy qazannan bastap jyldyq ınflıatsııanyń baıaýlaýy baıqaldy. Bul týraly Úkimet otyrysynda Ulttyq bank tóraǵasynyń birinshi orynbasary Erulan Jamaýbaev aıtty.
