Inflıatsııa negizgi eki kanal boıynsha júrip jatyr - mınıstr

ASTANA. KAZINFORM – Premer-Mınıstrdiń orynbasary — Ulttyq ekonomıka mınıstri Nurlan Baıbazarov elimizde ınflıatsııany tejeý boıynsha qabyldanyp jatqan sharalar týraly aıtyp berdi.

«Inflıatsııany tejeýdiń monetarlyq quraly óte tıimdi jumys isteýde. Ol búkil álemde moıyndalǵan. Joǵary mólsherlemeni ustap, ınflıatsııany qadaǵalaýǵa bolady. Biraq taǵy bir másele – munyń ekonomıkalyq ósýge tikeleı áser etýinde. Sondyqtan munda Úkimet ımportqa táýeldilikti azaıtý úshin jumys istep jatyr. Inflıatsııa shynymen de negizgi eki kanal boıynsha júrip jatyr: azyq-túlik jáne azyq-túlik emes taýarlar. Bul eki sanat aqyly qyzmetterdi qospaǵanda, jalpy ınflıatsııaǵa qosqan úlestiń úshten ekisin quraıdy», - dedi Baıbazarov búgingi Senat otyrysynda.

Ol 2022-2023 jyldary Ulttyq bankpen birlesip, ınflıatsııany tejeý jónindegi sharalar kesheni qabyldanǵanyn eske saldy. Úkimettiń basty mindeti – ımportqa táýeldilikti tómendetý.

«Biz anaǵurlym táýeldi salalarǵa, mysaly azyq-túlik taýarlaryna ınvestıtsııalar tartý boıynsha belsendi jumys istep jatyrmyz. Et, sút baǵytynda birqatar naqty joba júzege asyrylýda, oǵan aıtarlyqtaı qarajat bólindi. Bul jobalardyń barlyǵy jumys istep tur. Qus etine úlken táýeldilik bar edi, bıyl sútke, qusqa baılanysty 20-ǵa jýyq joba paıdalanýǵa berildi. Mal sharýashylyǵyn damytýdyń da úlken josparlary bar. Qazir Túrkistanda tutas klasterdi iske qosyp jatyrmyz», - dedi mınıstr.

Azyq-túlik emes taýarlar boıynsha mınıstr ımporttyń úlesi shamamen 60% quraıtyn qurylys materıaldary salasynda táýeldilik baıqalatynyn jetkizdi. Bul salada da ınvestıtsııalyq jobalar júzege asyrylýda.

Buǵan deıin QR Ulttyq banki tóraǵasynyń mindetin atqarýshy Vıtalıı Týtýshkın ınflıatsııa boljamdarynyń qanshalyqty senimdi ekenin túsindirgen edi.