Inflıatsııa, munaı baǵasy, ekonomıkalyq ósim: Ulttyq bank júrgizgen saýalnama neni kórsetti
ASTANA. KAZINFORM - Qazaqstan Ulttyq banki sarapshylar qaýymdastyǵy arasynda júrgizilgen kezekti makroekonomıkalyq saýalnamanyń nátıjesin jarııalady.
Sarapshylar Brent markaly munaı baǵasy, Qazaqstan ekonomıkasynyń ósýi, ınflıatsııa, bazalyq mólsherleme, taýarlar men qyzmetterdiń eksporty jáne ımporty, sondaı-aq teńge baǵamy boıynsha boljamdaryn usyndy.
Munaı baǵasy men ekonomıkanyń ósýi
Munaı baǵasyna qatysty stsenarıılik sharttar búkil boljamdy kezeńde joǵary qaraı qaıta qaraldy: 2026 jylǵa Brent markaly munaı baǵasy boıynsha kútýler barreline 82,7 AQSh dollarynan 88,4 AQSh dollaryna deıin, 2027 jylǵa – 75 AQSh dollarynan 80 AQSh dollaryna deıin, 2028 jylǵa – 73,7 AQSh dollarynan 75 AQSh dollaryna deıin kóterildi.
Qazaqstan ekonomıkasynyń ósýine qatysty boljamdar aıtarlyqtaı ózgergen joq. JІÓ ósimi 2026 jyly 4,8%, 2027 jyly – 4,7% (buǵan deıin – 4,6%), 2028 jyly – 4,4% (buǵan deıin – 4,3%) deńgeıinde kútiledi.
Inflıatsııa men bazalyq mólsherleme
Sarapshylardyń ınflıatsııa boıynsha boljamdary búkil boljamdy kezeńde tómendedi: 2026 jylǵa – 10%-dan 9,5%-ǵa deıin, 2027 jylǵa – 8,5%-dan 8,3%-ǵa deıin, 2028 jylǵa – 7%-dan 6,9%-ǵa deıin.
2026 jylǵa arnalǵan bazalyq mólsherleme boıynsha kútýler medıanasy 15,9% qurady (buǵan deıin – 16,0%). 2027 jylǵy boljam 13%-dan 13,3%-ǵa deıin, 2028 jylǵy boljam 10,5%-dan 11,5%-ǵa deıin ósti.
Saýalnamaǵa qatysýshylardyń quramy týraly
Saýalnamaǵa Qazaqstannyń makroekonomıkalyq kórsetkishterin taldaýmen jáne boljaýmen aınalysatyn 14 uıym qatysty. Respondentter qataryna naryqtyń kásibı qatysýshylary, zertteý ınstıtýttary, halyqaralyq uıymdar, sondaı-aq reıtıngtik agenttikter kiredi.
Aıta keteıik, makroekonomıkalyq saýalnamada Ulttyq Banktiń boljamdary qamtylmaıdy. Saýalnama nátıjesi naryqtyń kásibı qatysýshylarynyń táýelsiz pikirlerin, baǵalaýlary men kútýlerin kórsetedi.
Osyǵan deıin Ulttyq bank zeınetaqy qoryndaǵy qarajatqa qatysty málimdeme jasaǵan bolatyn.
