Inflıatsııa qalaı esepteledi – Ulttyq statıstıka bıýrosynyń jaýaby
Ulttyq statıstıka bıýrosynyń baǵa statıstıkasy departamentiniń dırektory Qýanyshbek Jaqypbekuly ınflıatsııany esepteý ádisteri týraly aıtyp berdi, dep habarlaıdy Kazinform.
«Biz ınflıatsııanyń mańyzdylyǵyn túsinemiz jáne jyldan- jylǵa esepteý ádistemesin jetildiremiz. Ádisteme halyqaralyq standarttarǵa sáıkes keledi. Biz zerttegen halyqaralyq tájirıbege sáıkes qaǵazdan elektrondy formatqa kóship jatyrmyz», - dedi Qýanyshbek Jaqypbekuly Astanada ótip jatqan DEMO DAY is-sharasy barysynda BAQ ókilderiniń saýalyna jaýap bere otyryp.
Onyń aıtýynsha, buǵan deıin barlyq derek qaǵazǵa toltyrylyp keldi.
«Búginde onlaın jáne oflaın mobıldi qosymsha ázirlendi. Shtrıh-kodty skanerleý arqyly derekter avtomatty túrde shyǵady jáne aǵymdaǵy baǵa engiziledi. Osylaısha biz jumys ýaqytyn qysqartamyz. Bizdiń qyzmetker bir ret batyrmany basý arqyly statıstıka úshin derekterdi jiberedi. Maýsym aıynan bastap biz qosymshany teksere bastadyq. Mysaly, qosymsha ınternet bolmaǵan kezde de jumys isteı alady jáne jelige qosylǵan kezde derekterdi jiberedi. 2024 jyldan bastap qaǵazdan bas tartýdy josparlap otyrmyz», - deıdi spıker.
