Inflıatsııa deńgeıin baqylaý jáne tómendetý sharalary qaıta qaralady — mınıstr

ASTANA. KAZINFORM — Inflıatsııamen kúres saıasatynyń tıimdi joldarynyń biri — ınvestıtsııa tartý. Bul týraly Premer-mınıstrdiń orynbasary — Ulttyq ekonomıka mınıstri Serik Jumanǵarın málim etti. 

— Inflıatsııany báseńdetý maqsatynda tarıftik saıasatpen keshende iske asyrylyp jatqan ınflıatsııa deńgeıin baqylaý jáne tómendetý boıynsha sharalar kesheni qaıta qaralady. Onda ishki naryqtyń teńgerimdiligin qamtamasyz etýge, naryqty ónimmen tolyqtyrýǵa jáne ónim aǵynyn boldyrmaýǵa basa nazar aýdarylady. Inflıatsııaǵa qarsy saıasattyń qosymsha bastamalarynyń biri ınvestıtsııa tartý. Ol naryqty otandyq ónimdermen tolyqtyrý úshin kóptegen shaǵyn óndiris qurýdy qamtamasyz etedi, — dedi Serik Jumanǵarın Úkimet otyrysynda.

Ulttyq ekonomıka mınıstriniń paıymdaýynsha, turaqty ınflıatsııalyq qysym jaǵdaıynda ornyqty ekonomıkalyq ósýdi qamtamasyz etý óte mańyzdy.

— Bıyl qańtar-shilde aılarynyń qorytyndysy boıynsha ekonomıkanyń ósýi 6,3%-ǵa jetti. Jyl sońyna deıin ósý qarqynyn ustap turý basym mindet. Bul rette Úkimet pen Ulttyq banktiń jaqyn perspektıvadaǵy biryńǵaı maqsaty — ınflıatsııa deńgeıin 5-6%-ǵa deıin tómendetý, — deıdi ol.

Buǵan deıin vıtse-premer Serik Jumanǵarın jalpy ishki ónimdi 2029 jylǵa qaraı eki ese arttyrý mindeti turǵanyn málim etken edi.