Inflıatsııa brıtandyqtardyń tamaqtaný ádetterin qalaı ózgertip jatyr
Brıtandyqtardyń úshten birine jýyǵy dastarhan basyna kúnine eki ret otyryp, úshinshi tolyq tamaqtanýyn jeńil as túrine aýystyrdy, al Ulybrıtanııanyń árbir onynshy turǵyny ádette kúnine bir ret qana tolyq tamaqtanyp júr, dep habarlaıdy Kazinform agenttiginiń tilshisi.
Ulybrıtanııanyń iri saýda jelisi Waitrose daıyndaǵan esebine sáıkes, Ulybrıtanııa turǵyndarynyń 95%-y tamaqtaný arasynda júrek jalǵap alady, al 50%-y kúnine eki-úsh ret nemese odan kóp tamaq ishedi. Eldiń árbir onynshy turǵyny tamaǵyn serýen kezinde nemese jumysqa bara jatyp jeıdi.
«Keıbireýler úshin belgilengen tamaqtaný ýaqyty ótkenniń enshisinde. Respondentterdiń úshten bir bóligi derlik (30%) ústel basyna kúnine eki ret otyryp, úshinshi taǵamdy jeńil tamaqpen almastyratynyn aıtty. Basqalary kúnine bir ret qana tamaqtanyp júr. Árbir onynshy adam kúnine bir ret as iship, qalǵan ýaqytta jeńil tamaqtanady», - delingen habarlamada.
«Tamaqtaný ýaqyty kóbinet – 15:00-den keıin (43%) jáne 12:00-den 15:00-ge deıin. Bul adamdar negizgi túski astyń ornyna jeńil tamaq ishe alatynyn kórsetedi», - dep atap kórsetti qujat avtorlary.
Taýarlar men qyzmetter baǵasynyń ósýine baılanysty ómir súrý deńgeıiniń daǵdarysy – Ulybrıtanııadaǵy basty taqyryptardyń biri. Eldegi azyq-túlik baǵasy osyndaı qarqynmen sońǵy ret 1970-shi jyldary kóterilgen.
«Bıyl basym bolyp qala beretin bir másele – azyq-túlik ınflıatsııasynyń joǵary deńgeıi. Bul adamdardyń satyp alý tásilin ǵana emes, tamaq ázirleý jáne tamaqtaný tásilin de ózgertti», - dedi Waitrose saýda jelisiniń atqarýshy dırektory.
Baǵaǵa nazar aýdaratyn satyp alýshylar baǵa men sapanyń jaqsy araqatynasyn izdeıdi, kóbine úlkenirek paketterdi satyp alady jáne aqsha únemdeý úshin aktsııalardy paıdalanady. Sondaı-aq olar taǵamdar tańdaýdy jeńildetip, úırenshikti ónimder men retseptterdi tańdaıdy.
Búginde Ulybrıtanııa turǵyndary táttige qaraǵanda aşy taǵamdardy kóp jeıdi: eń tanymal taǵam – chıpsy (29%), odan keıin torttar men pechene (22%) jáne shokolad (19%) tur.
Respondentterdiń 17%-y ǵana jeńil taǵam retinde jańǵaq, jemis nemese kókónis jeıdi.
