Inflıatsııa boıynsha syrtqy jáne ishki táýekelder saqtalyp otyr – UB
ASTANA. KAZINFORM — Búgin Úkimet otyrysynda Ulttyq bank tóraǵasy Tımýr Súleımenov 2027-2029 jyldarǵa arnalǵan áleýmettik-ekonomıkalyq damý boljamyna jáne bıýdjet parametrlerine túsinik berdi.
- Inflıatsııa ótken jylǵy qyrkúıektegi eń joǵarǵy kórsetkish 12,9 %-dan 10,2%-ǵa deıin tómendedi. Inflıatsııa sońǵy 10 aı qatarynan tómendeý úrdisin kórsetip keledi. Oǵan áser etip otyrǵan faktorlar: ustamdy qatań aqsha-kredıt saıasaty, aıyrbas baǵamynyń kúsheıýi, tutynýshylyq kredıtterdi qalypqa keltirý jáne Úkimet pen Ulttyq banktiń úılesken ınflıatsııaǵa qarsy sharalar kesheni. Degenmen ınflıatsııa áli de joǵary, syrtqy jáne ishki proınflıatsııalyq táýekelder saqtalyp otyr. Inflıatsııany ary qaraı turaqtandyrý úshin mynadaı sharalar qabyldanyp jatyr: teńgedegi aktıvterdiń tartymdylyǵyn arttyrý jáne artyq suranysty baıaýlatý úshin qalypty qatań aqsha-kredıt saıasaty júrgizilip jatyr. Aqsha-kredıt salasyn retteý boıynsha altyn satyp alý operatsııalaryn teńestirý úshin qosymsha sharalar qabyldanyp jatyr. 7 aı ishinde 2,4 trln teńge alyndy, al jyldyń aıaǵyna deıin tolyǵymen shamamen 4,1 trln teńge alynatyn bolady, - dedi T.Súleımenov.
Onyń aıtýynsha, mınımaldy rezervtik talaptar kezeń-kezeńmen artyp keledi. Bul shamamen 4 trln teńgeni únemdeýge, aqsha-kredıt saıasaty quraldarynyń shyǵysyn azaıtýǵa jáne aqsha bazasyn tómendetýge múmkindik beredi. Qarjylyq retteý agenttigimen birlesip qabyldanǵan sharalar nátıjesinde halyqty kredıtteýdi qalypqa keltirip, bızneske kredıt berýge kúsh jumsalyp jatyr.
- Úkimettiń, Ulttyq banktiń jáne Qarjylyq retteý agenttiginiń makroekonomıkalyq turaqtandyrý jáne halyqtyń ál-aýqatyn arttyrý jónindegi 2026-2029 jyldarǵa arnalǵan birlesken is-qımyl baǵdarlamasy, sondaı-aq 2026-2028 jyldarǵa arnalǵan ınflıatsııany baqylaý jáne tómendetý jónindegi sharalar kesheni iske asyrylyp jatyr. Ekinshiden, saýda teńgerimi eskerilgen. Saýda teńgerimi boljamdy kezeńde profıtsıt aımaǵynda saqtalady dep qarastyrylǵan, - dedi UB basshysy.
Ulttyq bank málimetine qaraǵanda, 2027-2029 jyldary Ulttyq qordan alynatyn qarajat kólemi 5 trln teńgege ulǵaıtyldy. Úkimettiń josparyna sáıkes, qarajat áleýmettik, kommýnaldyq, energetıkalyq jáne kólik ınfraqurylymy obektilerin qarjylandyrýǵa baǵyttalady.
Buǵan deıin elde ınflıatsııa qarqynynyń tómendeýi baıqalǵanyn jazǵan edik.
