Inflıatsııa boljamdaryna senýge bola ma – Ulttyq bank jaýaby
ASTANA. KAZINFORM – Inflıatsııany boljaý kezinde qoldanatyn modelge engizilgen alǵysharttar ınflıatsııa boljamdarynyń dál keletinin kórsetedi. Bul týraly QR Ulttyq banki tóraǵasynyń mindetin atqarýshy Vıtalıı Týtýshkın Senatta aıtty.
Búgin Senat qabyrǵasynda «2025 – 2027 jyldarǵa arnalǵan respýblıkalyq bıýdjet týraly» QR zańy qaralyp jatyr.
«10 aıdaǵy resmı statıstıka elimizde ınflıatsııa 8,5 paıyz deńgeıinde qalyptasqanyn kórsetti, bul 6-8 aralyǵynda kórsetilgen boljamnan asyp tústi. Munda TKSh tarıfteriniń ósýi ról oınady, janar-jaǵarmaıǵa shekti baǵalardyń josparly túrde alynýy da qymbattaýǵa jáne ınflıatsııaǵa yqpal etti. Ulttyq qordan qomaqty qarajat alý, bıýdjettiń teńgerimsizdigi, teńgeniń aıyrbas baǵamynyń qubylmalylyǵy sekildi proınflıatsııalyq faktorlar bar. Reseıden ınflıatsııa ımporty syn-qateri tónip tur. Qazan aıynda ondaǵy joǵary-negizgi mólsherleme 21 paıyzǵa deıin kóterildi, bul kórshi eldegi ınflıatsııanyń joǵary deńgeıin kórsetedi. Atalǵan faktorlardy eskere otyryp, 2025 jyly 5,5-7,5 paıyz, 2026 jyly – 5-6 paıyz jáne 2027 jyly – 5 paıyz ınflıatsııa boljamy qanshalyqty senimdi?», - dep surady Senat depýtaty Nurlan Bekenov.
QR Ulttyq banki tóraǵasynyń mindetin atqarýshy Vıtalıı Týtýshkın bul boljamdarǵa negiz bar ekenin aıtýda. ıAǵnı, 2025 jyly 5,5-7,5 paıyz, sodan keıin 2026 jyly – 5-7 paıyzǵa deıin tómendeý baıqalmaq.
«Nelikten biz buǵan senimdimiz? Birinshiden, qazirgi ınflıatsııa biz belgilegen boljamdarǵa sáıkes keldi. Sodan keıin ınflıatsııalyq kútý tómendeıdi dep boljap otyrmyz – ótken jyldyń qazan aıynda 16 paıyzdy, bıylǵy qazan aıynda 12,5 paıyzdy qurady. ıAǵnı, ınflıatsııalyq kútýdiń aıtarlyqtaı tómendeýi ekonomıkalyq sýbektilerdiń Ulttyq bank pen Úkimet tarapynan ınflıatsııany tómendetý salasynda qabyldanatyn sheshimderdiń durystyǵyn qoldaıtynyn jáne túsinetinin kórsetedi», - dedi ol.
Saýda seriktes elderde de spıker aldaǵy ýaqytta ınflıatsııanyń baıaýlaýyn boljap otyr.
«Qazirgi ýaqytta Reseıdegi ınflıatsııa dınamıkasy teris sıpatqa ıe, ol ósip keledi. Alaıda kelesi jyly Reseıdiń ortalyq banki ınflıatsııanyń aıtarlyqtaı baıaýlaıtynyn boljady jáne negizgi mólsherlemeniń tómendeý protsesi bastalatynyn aıtýda. Bul Reseı tarapynan Qazaqstandaǵy ishki baǵalarǵa ınflıatsııalyq qysymnyń aıtarlyqtaı tómendeıtinin kórsetedi. Degenmen biz ortasha qatań aqsha-nesıe saıasatyn jalǵastyramyz, eger ınflıatsııalyq protsesterdiń turaqty túrde tómendeıtinine senimdi bolmaıynsha, bazalyq mólsherlemeni tómendetpeımiz. Jańartylǵan boljamdar qosymsha 29 qarashada jarııalanady», - dedi V. Týtýshkın.
Buǵan deıin Ulttyq bank ınflıatsııa boljamyn jasaǵan edi.
