Inflıatsııa báseńdedi – Serik Jumanǵarın
ASTANA. KAZINFORM – Qyrkúıekte azyq-túlik taýarlarynyń baǵasy aılyq mánde 0,1 paıyzǵa tómendedi. Bul týraly Úkimet otyrysynda Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.
- Úkimet Ulttyq bankpen birlesip ınflıatsııany tómendetý boıynsha sharalardy iske asyrýdy jalǵastyryp jatyr. Qabyldanǵan sharalardyń áserinen ınflıatsııa birtindep baıaýlaýdy jalǵastyryp keledi. Jyldyq ınflıatsııa bıyl tamyzdaǵy 9,8%-dan qyrkúıektiń qorytyndysy boıynsha 9,3%-ǵa deıin baıaýlady, - dedi ol.
Vıtse-premerdiń aıtýynsha, ınflıatsııanyń baıaýlaýyna negizgi úlesti azyq-túlik taýarlaryna baǵa ósý qarqynynyń tómendeýi qosty.
- Qyrkúıekte azyq-túlik taýarlarynyń baǵasy aılyq mánde 0,1%-ǵa tómendedi. Inflıatsııany tejeý – Úkimettiń halyqtyń naqty tabysyn arttyrý jónindegi jumysynyń bir baǵyty. Inflıatsııanyń baıaýlaýy osy jyldyń ekinshi toqsanynda halyqtyń naqty aqshalaı tabysy birinshi toqsandaǵy 0,1%-dan 0,7%-ǵa deıin ósti, - dedi Serik Jumanǵarın.
Aıta keteıik, bıyl 9 aıdyń qorytyndysynda el ekonomıkasynyń ósýi 4,2 paıyzdy qurady.
