Inflıatsııanyń jyldyq kórsetkishi 6,7 paıyzdy qurady - Ulttyq bank tóraǵasy
ALMATY. Qazannyń 5-i. QazAqparat /Erlik Erjanuly/ - Statıstıkalyq agenttiktiń derekterine qaraǵanda, qyrkúıek aıynda ınflıatsııa deńgeıi 0,6 paıyz boldy.
Bul jaıly QR Ulttyq bank tóraǵasy Grıgorıı Marchenkonyń búgin Almatyda ótkizgen baspasóz máslıhatynda aıtyldy.
Qyrkúıek aıynda azyq-túlik taýarlary - 0,4 paıyzǵa, azyq-túlikke jatpaıtyn taýarlar - 0,5 paıyzǵa, aqyly qyzmet kórsetý - 0,8 paıyzǵa ósti. Azyq túlik taýarlary naryǵynda baǵa jarmada - 5,5 paıyz, bıdaı unynda - 3,6 paıyz, maı men tońmaıda 3,2 paıyzǵa qymbattap, jemister men kókenister 3 paıyzǵa arzandady. Azyq-túlikke jatpaıtyn taýarlar tobynda baǵa suıytylǵan gazda - 6 paıyzǵa, qatty otynda 1,1 paıyzǵa artty. Al aqyly qyzmet kórsetý naryǵynda bilim berý - 5,9 paıyzǵa, turǵyn úı kommýnaldyq qyzmeti 0,5 paıyzǵa kóterildi.
Bas bankırdiń aıtýynsha, ınflıatsııa deńgeıi qańtar men qyrkúıek aılarynyń arasynda - 5,2 paıyz, al jyldyq kórsetýde 6,7 paıyz boldy. 12 aılyq kórsetkishte baǵa azyq-túlik taýarlarynda - 6,5 paıyzǵa, azyq-túlikke jatpaıtyn taýarlarda - 5,6 paıyzǵa, aqyly qyzmet kórsetýde 8,1 paıyzǵa qymbattady. 2009 jylǵy qyrkúıekte ol azyq-túlikte - 6,2 paıyz, azyq-túlikke jatpaıtyn taýarlarda - 3 paıyz, al aqyly qyzmette 8,6 paıyzdy quraǵan bolatyn.
