Inflıatsııanyń boljamdyq dálizin qamtamasyz etýde sońǵy aılarda baǵanyń kúrt ósimine jol bermeý mańyzdy - Úkimet otyrysy
TANA. 15 qarasha. QazAqparat /Rýslan Ǵabbasov/ - Inflıatsııanyń boljamdyq dálizin qamtamasyz etýde sońǵy aılarda baǵanyń kúrt ósimine jol bermeý mańyzdy.
Bul týraly búgin Úkimet otyrysynda bıylǵy on aıdyń áleýmettik-ekonomıkalyq damý qorytyndysy boıynsha baıandama jasaǵan Ekonomıkalyq damý jáne saýda mınıstri Qaırat Kelimbetov málim etti.
«Inflıatsııanyń boljamdyq dálizin qamtamasyz etý úshin bıylǵy jyldyń sońǵy aılarynda baǵanyń kúrt ósimine jol bermeý mańyzdy.
Bizdiń esepteýler boıynsha qarasha-jeltoqsan aılarynda ınflıatsııa qarqyny 0,7 paıyzdan kóterilmese, onda ınflıatsııanyń jyldyq deńgeıi 8 paıyzdan aspaýy tıis»,-dedi mınıstr.
Osy oraıda Q. Kelimbetov azyq-túlik taýarlary turǵysynda Aýyl sharýashylyǵy mınıstrligi men jergilikti atqarý organdary ishki naryqtaǵy baǵanyń, onyń ishinde birinshi kezekte áleýmettik mańyzdy taýarlardyń qunynyń turaqtylyǵyn qamtamasyz etýde tıisti sharalar qabyldaýy kerektigin aıtyp ótti.
Aıta keteıik, búgin Úkimet otyrysynda jyl basynan beri Qazaqstandaǵy ınflıatsııa 6,5 paıyzdy quraǵany málim boldy.
«Jyl basynan bergi kezeńde tutynýshy taýarlary men qyzmet kórsetýge baǵa kórsetkishteri 6,5 paıyzǵa artty. Bul óz kezeginde ótken jyldyń sáıkes kezeńine qaraǵanda 0,3 paıyzdyq pýnktke joǵary», - dep atap ótti mınıstr.
Inflıatsııany quraýshylardyń ishinde kóbinese baǵanyń ósimi azyq-túlik taýarlarynyń úlesinde (8 paıyz). Aqyly qyzmetterdiń qunynyń ósimi 6,7 paıyzdy, al azyq-túlik emes taýarlarynyń ósimi 4,4 paıyzdy qurady.
Vedomstvo basshysynyń aıtýynsha, ishki naryqtaǵy baǵanyń ósimi negizinen álemde azyq-túlik jáne energııa resýrstarynyń qymbattaýy úrdisimen túsindirilip otyr.
