Inflıatsııanyń 50 paıyzdan astamy azyq-túlik baǵasynyń ósýimen baılanysty - mınıstrlik
Bul týraly Úkimet otyrysynda ınflıatsııaǵa qarsy den qoıý sharalarynyń keshenin talqylaý kezinde Ulttyq ekonomıka mınıstri Áset Erǵalıev málim etti, dep habarlaıdy QazAqparat tilshisi.
«Jahandyq pandemııa búkil álemdegi ınflıatsııalyq protsesterge qysym jasaıtyn buryn-sońdy bolmaǵan makroekonomıkalyq soqqyǵa aınaldy. Logıstıkalyq tizbekterdiń buzylýy, suranystaǵy qurylymdyq ózgerister, ekonomıkany qoldaýǵa baǵyttalǵan ekspansııalyq monetarlyq jáne fıskaldyq baǵdarlamalardy qabyldaý jáne basqa da trendterdiń áserinen búgingi kúni ınflıatsııanyń ósýi búkil álemde baıqaldy. Nátıjesinde, halyqaralyq qarjy uıymdary 2021 jyly ınflıatsııanyń búkil álemde 3,9%-ǵa jedeldeýin boljaıdy. Qazaqstanda bııalǵy tamyzda ınflıatsııanyń aı saıynǵy ósýi 0,5%-dy qurady», - dedi Á. Erǵalıev.
Onyń aıtýynsha, maýsymaralyq faktorlar jáne keıinge qaldyrylǵan suranys áserinen aqyly qyzmetter ári azyq-túlik emes taýar baǵalarynyń ósýiniń úlesi artty. Osynyń saldarynan, aqyly qyzmetter boıynsha baǵalardyń ósýi 0,8%, azyq - túlik emes taýarlar boıynsha - 0,6%, azyq-túlik taýarlary boıynsha 0,1% qurady.
«Jyldyq esepteýde Qazaqstanda ınflıatsııa 8 aıdyń qorytyndysy boıynsha 8,7%-dy qurady jáne tarıhı qalyptasqan qurylymǵa sáıkes, onyń 50%-dan astamy azyq-túlik taýarlary baǵasynyń ósýine tıesili bolyp otyr», - dedi mınıstr.
