Inflıatsııany baqylaý jáne tómendetý jónindegi keshendi jospar ózektendirildi - Qýantyrov
«Qazaqstan ekonomıkasy 2022 jyl boıy ınflıatsııalyq qysymnyń ósýi jaǵdaıynda jumys istedi. Jyl sońyna qaraı ınflıatsııa óz sharyqtaý shegine jetip, 20,3 paıyzdy qurady. Inflıatsııanyń ósýine birqatar faktorlar, sonyń ishinde ishki naryqta da, syrtqy naryqta da suranystyń artýy, sondaı-aq mıgranttar aǵynyna baılanysty taýar tapshylyǵy sebep boldy. Inflıatsııanyń ósýine negizgi úlesti azyq-túlik ónimderi, sonyń ishinde áleýmettik mańyzy bar azyq-túlik taýarlary qosýda», - dedi mınıstr.
Osy rette ol jyldyń negizgi trendteri retinde jahandyq ınflıatsııanyń ortasha jyldyq deńgeıiniń 2022 jylǵy 8,8 paıyzdan 2023 jyly 6,6 paıyzǵa deıin tómendeýin; ekonomıkanyń jahandyq ósýiniń jartysyna jýyǵyn qamtamasyz etýge múmkindik beretin Qytaı naryǵynyń ashylýyn; ortalyq bankterdiń bazalyq mólsherlemelerdi kóterýin; jahandyq jetkizý tizbegindegi kedergilerdiń álsireýin; sondaı-aq, geosaıası shıelenistiń saqtalýyn atap ótti.
«Inflıatsııany baqylaý jáne tómendetý jónindegi 2023-2024 jyldarǵa bekitilgen keshendi jospar 67 is-sharadan turady. Onyń 20-sy oryndalyp, 47 is-sharanyń iske asyrylýy 2023 jáne 2024 jyldary jalǵasady. Sharalar keshenin ózektendirý aıasynda mınıstrlik múddeli memlekettik organdarmen birge, negizinen, ónim óndirýdi ulǵaıtýǵa baǵyttalǵan 46 jańa shara ázirledi. Úkimet óz aldyna ınflıatsııany nysanaly dáliz shekarasynda ustap turý jáne taýarlar tapshylyǵyna jol bermeý mindetin qoıyp otyr. Jańartylǵan is-sharalar kesheni 5 baǵyt boıynsha iske asyrylyp, óndiris kólemin arttyrýdy, taýarlardy saqtaýdy, logıstıkany, bólshek saýdany, baǵany belgileýdegi baqylaýdy, monopolııaǵa qarsy áreketterdi jáne syrtqy saýdany retteýdi kózdeıtin, sondaı-aq basqa da júıeli 93 jedel jáne orta merzimdi sıpattaǵy sharany qamtıdy», - dedi Álibek Qýantyrov.
