Inflıatsııany aýyzdyqtaýǵa tıisti sharalar qabyldanbasa, onyń deńgeıi jyl sońynda belgilengen dálizden asyp túsýi yqtımal - Ó. Shókeev
ASTANA. Mamyrdyń 11-i. QazAqparat /Ernur Aqanbaı / - Elimizdiń azyq-túlik naryǵyndaǵy baǵalardyń ósimin toqtatýǵa sharalar qabyldanbaıtyn bolsa, 2010 jyldyń sońynda Qazaqstandaǵy ınflıatsııa deńgeıi belgilengen dálizden shyǵyp ketip, 9-10 paıyzdy quraýy yqtımal. Bul týraly búgin selektor formatyndaǵy Úkimet otyrysynda Premer-Mınıstrdiń birinshi orynbasary Ómirzaq Shókeev málim etti,
dep habarlaıdy QazAqparat.
«Ótken jyldyń birinshi toqsanynda ınflıatsııa deńgeıi 2,8 paıyz bolsa, bıyl birinshi toqsanda 2,6 paıyzdy qurap otyr. 2010 jyldyń qorytyndysy boıynsha, ınflıatsııa deńgeıin 6-8 paıyzdyq dálizde ustaý boljanyp otyr. Alaıda, jaǵdaı qazirgideı jalǵasa beretin bolsa, biz bul dálizden asyp túsip, 9-10 paıyzǵa ótip ketýimiz yqtımal», dedi Ó. Shókeev.
Deı turǵanmen Ó. Shókeev buǵan jol berýge bolmaıtynyn atap kórsetti. «Bizde áli ýaqyt bar. Sondyqtan biz ınflıatsııa deńgeıin belgilengen dálizde ustap turý úshin qandaı sharalardy qabyldaý qajettigin bilemiz. Bul rette ákimder byltyr daǵdarys ýaqytynda iske qosqan shtabtardyń jumysy qaıta jandanatynyna úmit artamyz», dedi birinshi vıtse-premer.
Onyń aıtýynsha, ınflıatsııanyń deńgeıine baılanysty óńirdegi jaǵdaılar ártúrli. «Inflıatsııa deńgeıi respýblıkalyq ortasha deńgeıden joǵary óńirler ony aýyzdyqtaý úshin shuǵyl sharalardy qabyldaýy tıis. Inflıatsııa deńgeıiniń ósýine jyl basynan beri birqatar kommýnaldyq qyzmetterdiń baǵasynyń qymbattaǵany yqpal etti. Biz azyq-túlik naryǵyndaǵy jaǵdaıdy rettemeıinshe, eshqandaı artyq is-qımyl jasamaýymyz kerek. Sondyqtan biz ekinshi toqsanda azyq-túlik naryǵyndaǵy jaǵdaıdyń baıybyna barýǵa nazar aýdarýǵa tıispiz», dedi ol.
