Inflıatsııalyq qysym geosaıası shıelenistiń saldarynan kúsheıip otyr – Ulttyq bank

NUR-SULTAN. QazAqparat – Álemdegi jappaı qymbatshylyq Qazaqstannyń memlekettik baǵaly qaǵazdarynyń kiristiligine de áser etken. QR Ulttyq bankiniń tóraǵasy Ǵalymjan Pirmatov Úkimet otyrysynda osyndaı málimet berdi, dep habarlaıdy QazAqparat tilshisi.

«Inflıatsııanyń syrtqy jáne ishki faktorlary baǵanyń ósý jaǵyna qaraı qysymdy kúsheıtip keledi. Álemde ınflıatsııalyq qysym geosaıası shıelenistiń saldarynan kúsheıip otyr. Ol jaıt taýar jetkizilimindegi problemalardy ýshyqtyra tústi.

Azyq-túliktiń álemdik baǵasy joǵary deńgeıde saqtalyp otyr. Shıkizat pen materıaldar quny turaqty túrde óskendikten, daıyn ónim de jappaı qymbattady», - dedi Ulttyq bank basshysy.

Onyń málimeti boıynsha, memlekettik baǵaly qaǵazdardyń kiristiligi ósken. Sondaı-aq ol AQSh Federaldy rezerv júıesinen keıin Eýropa ortalyq banki de shilde aıynda mólsherlemelerdi kóterýi múmkin ekenin atap ótti.

«Naryqtyń boljamdary boıynsha, Eýropa Ortalyq bankiniń depozıt mólsherlemesin 2022 jyldyń sońyna qaraı -0,5%-dan oń mánge deıin, al 2023 jyly 1%-dan joǵary kóteredi. Anglııanyń ortalyq banki mamyrda mólsherlemeni 25 bazıstik tarmaqqa 1%-ǵa deıin kóterdi.

Inflıatsııalyq boljamdardyń uzaq ýaqyt boıy maqsattan aýytqý qaýpi ortalyq bankterdi monetarlyq saıasatty agressıvti túrde kúsheıtýge ıtermeleıdi.

Geosaıası táýekelderdiń oryn alýy jáne AQSh Federaldy Rezerv Júıesiniń monetarlyq saıasatty kúsheıtýi jyl basynan beri AQSh dollary ındeksiniń 7,6%-ǵa ósýine sebep boldy», - dedi Ǵalymjan Pirmatov.

Buǵan deıin Ulttyq bank teńge baǵamyn turaqtandyrý sharalaryn júrgizip jatqanyn málim etken bolatyn.