Inflıatsııaǵa qatysty boljamdar turaqsyz bolyp otyr – Ulttyq bank

NUR-SULTAN. QazAqparat – Álemdegi geosaıası jaǵdaıǵa baılanysty ınflıatsııa aıtarlyqtaı ósken. Bul týraly QR Ulttyq bankiniń tóraǵasy Ǵalymjan Pirmatov málim etti, dep habarlaıdy QazAqparat tilshisi.

«Inflıatsııa geosaıası jaǵdaıǵa baılanysty aıtarlyqtaı ósti. Búginde álemde jáne elimizde baǵalardyń ósýi jáne ınflıatsııalyq qysymnyń artqanyn baıqap otyrmyz. Mundaı jaǵdaıda ınflıatsııanyń jyldyq ósýi 12%-ǵa deıin kótereledi. Sebebi baǵanyń ósýi barlyq salada baıqalyp otyr. Bastapqy kezde qubylmalylyǵy shamaly jáne tek orta merzimdi kezeńde ǵana tómendeıtin ınflıatsııanyń eleýli túrde óskenin baıqaımyz. Muny 2022 jylǵy naýryzda bazalyq ınflıatsııaǵa berilgen ártúrli baǵalaý aıǵaqtaıdy. Qazir ınflıatsııaǵa qatysty boljamdar joǵary jáne turaqsyz bolyp otyr», - dedi Ǵalymjan Pirmatov Ulttyq bankte ótken baspasóz máslıhatynda.

Onyń aıtýynsha, bazalyq mólsherlemeni kóterý, ınflıatsııanyń ósý úrdisine jol bermeý jolyndaǵy qajetti shara.

«Bıyl naýryzda respondentter arasynda júrgizilgen saýalnama qorytyndysy halyq seniminiń tómendep, ınflıatsııalyq kútýlerdiń birshama artqanyn kórsetti. Inflıatsııany sandyq baǵalaý 2022 jylǵy naýryzda 11,4%-dy kórsetti. Osyǵan baılanysty júrgizilip otyrǵan saıasatqa jáne onyń ınflıatsııa boıynsha málimdelgen maqsatqa jetý qabiletine halyqtyń senimin arttyrý Ulttyq banktiń basym mindeti bolyp qala beredi. Bul úshin aqsha-kredıt saıasaty ınflıatsııany nysanaly baǵdar deńgeıine deıin tómendetýge negizdelýi kerek», - deıdi ol.

Buǵan deıin Ulttyq bank basshysy bazalyq stavkany kóterý sebebin túsindirip berdi.