Inflıatsııa qarqyny joǵary deńgeıde qalyp otyr – Ulttyq bank
«Ulttyq banktiń Aqsha-kredıt saıasaty komıteti 2022 jylǵy 6 qyrkúıekten bastap bazalyq mólsherlemeni 14,5 paıyz deńgeıinde saqtaý týraly sheshim qabyldadyq. Sheshim kelesi boljamdy raýndtyń nátıjeleri negizinde qabyldandy. Biz bıyldyń sońyna deıin jáne orta merzimdi kezeńge ınflıatsııa men naqty jalpy ishki ónimniń ósýi boıynsha baǵalaýdy jańarta otyryp, makroekonomıkalyq ahýaldyń budan bylaıǵy damýyna qatysty boljamdarymyzdy ózgerttik», - dedi Ǵ. Pirmatov elordada ótken baspasóz máslıhatynda.
Onyń aıtýynsha, ınflıatsııanyń aılyq dınamıkasy osy jylǵy naýryzdaǵy eń joǵarǵy deńgeıden tómendeýine qaramastan, ortasha jyldyq mánderden asyp, áli de joǵary deńgeıde qalyp otyr.
«Jyldyq mánde ınflıatsııa 16,1 paıyzǵa jetti. Azyq-túlik ónimderi baǵasynyń ósýi jyldyq mánde 20,8 paıyzǵa jetip, eń kóp úles qosyp otyr. Azyq-túlikke jatpaıtyn ınflıatsııa da ımporttyq taýarlardyń qymbattaýyna baılanysty 15,5 paıyzǵa deıin ósti. Atap aıtqanda, bul suranystyń ósýi aıasynda sharýashylyq taýarlaryna, sondaı-aq keńse taýarlaryna qatysty boldy», - dep túsindirdi UB basshysy.
Onyń sózine qaraǵanda, aqyly qyzmetter ınflıatsııasy 10,1 paıyzǵa jetti. Jabdyqtalǵan turǵyn úıdi jalǵa berý boıynsha baǵanyń eń joǵary ósýi baıqalyp otyr. 2022 jylǵy 1 shildege deıin tarıfterdi kóterýge qoıylǵan moratorıı aıaqtaldy. Osy oraıda barlyq óńirlerde monopolıst kásiporyndardyń qyzmetterine tarıfter ózgerdi. Osylaısha, olardyń aılyq ósimi 1,3% boldy.
Ǵ. Pirmatovtyń paıymynsha, ınflıatsııa qatysty baǵalaý áli de joǵary bolyp tur. Bıyldyń qorytyndysy boıynsha jańartylǵan boljamdarǵa sáıkes, ınflıatsııa 16-18 paıyz deńgeıinde bolýy múmkin. Bul Ulttyq banktiń aldyńǵy boljamynan joǵary.
Budan buryn habarlanǵandaı, Ulttyq bank bazalyq stavkany 14,5% deńgeıinde saqtap qalady.
