Inflıatsııa qarqyny baıaýlaıdy – Ulttyq bank
«Ulttyq bank eldiń 2023-2027 jyldarǵa arnalǵan makroekonomıkalyq damý boljamdaryn ázirleýge qatysty. Bizdiń quzyretimizdegi kórsetkishter boıynsha kelesini habarlaımyz. Birinshiden, bizdiń boljamymyz boıynsha, ınflıatsııa 2023 jyldyń sońyna qaraı bazalyq mólsherlemege qatysty qabyldanatyn sheshimder, kontrtsıkldyq bıýdjet qaǵıdalaryn iske asyrýdy josparlaý, syrtqy ınflıatsııalyq qysymdy ret-retimen tómendetý jáne bıylǵy joǵary baza esep aıyrysýlarynan shyǵý aıasynda qazirgi deńgeıden 7,5-9,5 paıyzǵa deıin baıaýlaıdy», - dedi Aqyljan Baımaǵambetov.
Onyń aıtýynsha, qazirgi ýaqytta Ulttyq bankte kezekti boljamdy raýnd ótkizilip jatyr, onyń nátıjesi bıylǵy 5 qyrkúıekte jarııalanady.
«Orta merzimdi kezeńde tosyn ózgerister oryn almasa, ınflıatsııa 2024 jyldyń sońyna qaraı nysanaly dálizge jýyqtaıtyn bolady», - dedi UB ókili.
Aıta keteıik, QR Ulttyq ekonomıka mınıstri Álibek Qýantyrov Úkimet otyrysynda eldiń 2023-2027 jyldarǵa arnalǵan áleýmettik-ekonomıkalyq damý boljamynyń jobasyn tanystyrdy.
«Inflıatsııa barlyq stsenarıılerde 2023 jyly 7,5-9,5% deńgeıinde, 2024 jyly 4-5% deńgeıinde, keıinnen 2025 – 2027 jyldary 3-4%-ǵa deıin tómendeıdi dep belgilendi»,- dedi mınıstr.
Ashyq kózderden alynǵan foto