Inflıatsııa deńgeıin tómendetýge qatysty jańa sharalar kesheni ázirlendi - Smaıylov
«Prezıdent bıýdjettiń kiris bóligin ulǵaıtý máselesin atap kórsetti. Qazirgi tańda taý-ken sektorynda paıdaly qazbalardy óndirýge salynatyn salyq mólsherlemesin, munaı ónimderin óndirýshilerge arnalǵan aktsızderdi, jer qoınaýyn paıdalanýshylardyń dıvıdentteri boıynsha jeńildikterdi jáne transferttik baǵa belgileý tártibin qaıta qaraý boıynsha usynystar daıyn boldy. Ulttyq ekonomıka jáne Qarjy mınıstrlikteri osy usynystardy jurtshylyq pen bızneske keńinen túsindirip, olardyń tez arada zań júzinde bekitilýin qamtamasyz etýi qajet», - dedi Úkimet basshysy.
Sonymen qatar ol maınıng salasynyń problemalyq máselelerin shuǵyl retteý qajettigine nazar aýdartty.
«Qazirgi kezde Úkimet maınıng tásilderin qaıta qarap jatyr. Bul salany retteý jáne damytý úshin Tsıfrlyq damý mınıstrligi múddeli memlekettik organdarmen birlesip, barlyq máselelerdi Májilis depýtattary bastamashy bolǵan «Tsıfrlyq aktıvter týraly» zań jobasy aıasynda pysyqtaýy qajet», - dedi Premer-Mınıstr.
Sonymen qatar Úkimet basshysy Prezıdent tapsyrmasyna sáıkes, Inflıatsııa deńgeıin baqylaý jáne ony tómendetýge qatysty jańa sharalar kesheni ázirlengenin aıtty.
«Ol egis alqaptaryn kóbeıtý jáne azyq-túlik ónimderin óndirý men óńdeý salasyndaǵy ınvestıtsııalyq jobalardy iske asyrý arqyly otandyq óndiristi ulǵaıtýǵa baǵyttalǵan. Sonymen qatar janar-jaǵarmaı materıaldaryn óndirý men olardy bólý júıesin reformalaý boıynsha júıeli sharalar qabyldanatyn bolady. Sondaı-aq baǵany belgileýge baqylaý jasaý jáne monopolııaǵa qarsy retteý sharalary kózdelip otyr. Qabyldanyp jatqan sharalar baǵany birtindep turaqtandyrýǵa, ınflıatsııany nysanaly deńgeıde ustap turýǵa, jáne bıznes ahýaldy jaqsartýǵa yqpal etedi. Osyǵan oraı Inflıatsııa deńgeıin baqylaý jáne tómendetý boıynsha sharalar keshenin maquldaýdy usynamyn», - dedi ol.
Premer-Mınıstr memlekettik organdardyń birinshi basshylary men ákimderge atalǵan is-sharalardyń sapaly jáne tıimdi oryndalýyn erekshe baqylaýǵa alýdy tapsyrdy.
«Sharalar kesheniniń oryndalý barysyn Úkimette turaqty túrde qaraıtyn bolamyz. Jalpy memlekettik jáne kvazımemlekettik sektordyń satyp alýyn jetildirý boıynsha usynylǵan sharalardy qoldaımyz. Qarjy mınıstrligi «Samuryq-Qazyna» qorymen birlesip, osy usynystardy zań júzinde bekitý máselesin jyldamdatyp pysyqtasyn», - dedi Álıhan Smaıylov.
