Infektsıonıst balalar arasynda tumaý nege aýyr júrip jatqanyn túsindirdi

ASTANA. KAZINFORM – Densaýlyq saqtaý mınıstrliginiń shtattan tys bas ınfektsıonısi Dınagúl Baesheva Ortalyq kommýnıkatsııalar qyzmetinde ótken baspasóz máslıhatynda balalar arasynda tumaý nege aýyr júrip jatqanyn túsindirdi.

- Qazir ata-analar mektepterdegi súzgini aınalyp ótip, medıtsınalyq statsıonarlarda keshki saǵat 18.00-den keıin toptasýdy ádetke aınaldyryp jatyr. Keıin aýrýhanada oryn tapshy dep jazýda. Shyn máninde balanyń jaǵdaıy aýyr bolmasa, shynymen de aýyr naýqastanǵan adamdardyń arasyna barýdyń qajeti joq. Balańyzdyń dene qyzýy joǵary bolyp, jedel járdem shaqyrsańyz kelmeýi múmkin. Óıtkeni júkteme úlken bolyp tur. Birinshi kezekte balanyń bólmesinde temperatýra ystyq bolý kerek. Ekinshiden, qyzý túsiretin dáriler berý kerek, - dedi maman.

Sondaı-aq, ol qazir balalar arasynda ınfektsııany qaıtalap juqtyrý beleń alyp jatqanyn aıtty.

- Basqalaı aıtsaq, qarapaıym tumaýy bar bala tumaýy aýyr júrip jatqan baladan vırýs juqtyryp jatyr. Qazir bir naýqastyń boıynda úsh nemese odan kóp vırýs órshigen (trıdemııa jáne mýltıdemııa – red.) jaıttar kóbeıip barady. Aýyryp tursa da balabaqshaǵa baryp júrgen balalar keıin qatty aýyryp qalyp jatyr. Keıin ata-anasy balam qatty aýyryp qaldy dep aýrýhanaǵa júgiredi. Máseleniń bári osydan týyndap jatyr, - dedi ol.

Buǵan deıin Densaýlyq saqtaý mınıstri Aqmaral Álnazarova bıyl vırýstardyń órshýi jeltoqsannyń ortasyna deıin jalǵasýy múmkin ekenin aıtqan edi.