«Infektsııanyń taralý oshaǵy zalalsyzdandyryldy» - UQShU jattyǵýlary

ASTANA. QazAqparat – Ujymdyq qaýipsizdik týraly shart uıymy Jedel den qoıý ujymdyq kúshteriniń «Ózara is-qımyl-2022» oqý-jattyǵýy barysynda asa qaýipti ınfektsııanyń órshýine jol bermeý jónindegi tapsyrmalar oryndaldy. Bul týraly QazAqparat QR Qorǵanys mınıstrligine silteme jasap habarlaıdy.

Atalǵan oqý-jattyǵý is-sharalaryna jergilikti sanıtarııalyq-epıdemıologııalyq organdardyń qyzmetkerleri jáne Qazaqstan Densaýlyq saqtaý mınıstrliginiń Bıologııalyq qaýipsizdik máseleleri ǵylymı-zertteý ınstıtýtynyń mamandary tartyldy.

Oqý-jattyǵý jospary boıynsha UQShU-nyń Jedel den qoıý kúshteriniń birlesken operatsııasy barysynda bólimshelerdiń birinde býbon chýmasynyń belgileri bar naýqas anyqtaldy. Juqtyrǵan adam qysqa merzimde aýrýhanaǵa jatqyzylyp, qajetti bıologııalyq taldaýlar júrgizildi jáne aýdanda arnaıy karantındik rejım engizildi.

RHBQ kúshteri men quraldary jergilikti jerge bıologııalyq barlaý jasap, áskerı lager obektilerine, irgeles aýmaqqa, kirme joldarǵa, jeke quram men áskerı tehnıkaǵa sanıtarlyq óńdeý júrgizdi. Áskerı polıtsııa bólimshesi karantındik is-sharalardy qamtamasyz etýge, onyń ishinde ótkizý rejımin uıymdastyrýǵa jáne aýmaqty qorshaýǵa jumyldyryldy.

UQShU jattyǵýlarynda radıatsııalyq, hımııalyq jáne bıologııalyq qorǵaý jáne medıtsınalyq qamtamasyz etý birikken bólimshesi alǵash ret qurylǵanyn atap ótken jón. Bólimshe jergilikti jerge bıologııalyq barlaý júrgizýge, bıologııalyq synamalardy taldaýǵa, jeke quramdy sanıtarııalyq óńdeýge, áskerı tehnıka jáne úı-jaılardy dezınfektsııalaýǵa qajetti tehnıkamen jaraqtandyrylǵan.

Foto: gov.kz