«Infektsııalyq baqylaý kúsheıtiledi» - respýblıkalyq basylymdarǵa sholý

***

«Egemen Qazaqstan» gazetiniń QR Prezıdenti baspasóz qyzmetine silteme jasap habarlaýynsha, Memleket basshysy Nursultan Nazarbaevtyń atyna Frantsııa Prezıdenti Nıkolıa Sarkozıden Qazaqstannyń EQYU-ǵa tóraǵalyǵynyń bastalýyna baılanysty joldaý-hat kelip túsken. Frantsýz memleketiniń bas­shy­sy Qazaqstannyń osy tarıhı mıssııany oryndap shyǵýyna tabys tilegen. Hatta «Men Qazaqstan atal­ǵan múmkindikti paıdalana oty­ryp, óziniń irgeli qaǵıdattary men osy Uıymnyń qundylyq­ta­ryn ustanatyndyǵyn taǵy da dá­leldeıdi dep senemin. Sizderdiń tór­aǵalyqtaryńyzdy tabysty ótkizýge qol jetkizýde Siz Fran­tsııa­nyń qoldaýyna jáne jeke meniń qoldaýyma senseńiz bolady», delingen.

Frantsııa Prezıdenti Nıkolıa Sarkozıdiń QR Prezıdenti Nursultan Nazarbaevqa jibergen joldaý-haty «Kazahstanskaıa pravda» gazetinde de jarııalandy. «Men 2010 jyly EQYU Sam­mı­tin ótkizý ıdeıasy jańa qol­daý­ǵa ıe bolatynyn qanaǵatta­nar­lyq sezimmen atap ótemin. Biz áli naqty sheshim qabyldama­ǵan­darmen birlesken jumysty jalǵastyrýymyz qajet. Siz bizdiń elderimizdiń ara­syn­daǵy tyǵyz qarym-qaty­nas­tarǵa meniń qandaılyq mán bere­tinimdi bilesiz. Bizdiń ótken jyl­ǵy qazanda Astanadaǵy kezdesýi­miz oǵan jańa serpin berdi. Budan bylaı da biz osy qarqyndy ustaýymyz kerek», delingen Frantsııa Prezıdentiniń joldaý-hatynda.

Osy basylymda Qazaqstan Respýblıkasynyń Memlekettik hatshysy - Syrtqy ister mınıstri Qanat Saýdabaevtyń «Qazaqstannyń juldyzdy saǵaty» atty maqalasy jaryq kórdi. «14 qańtarda Venada Eýropa­daǵy qaýipsizdik jáne ynty­maq­tastyq uıymy Turaqty keńe­si­niń otyrysynda Qazaqstan Respýblıkasynyń 2010 jyly EQYU-ǵa tóraǵalyǵynyń resmı tusaýkeseri bolyp, Prezıdent Nursultan Nazarbaevtyń Uıymǵa qatysýshy memleketterge úndeýi onyń basty oqıǵasyna aınaldy. EQYU úshin buryn-sońdy mundaı oqıǵanyń bolmaǵandyǵynan ǵana emes, sonymen qatar, Qazaqstan Prezıdentiniń Uıymnyń jaýapkershilik aımaǵyndaǵy osy zamanǵy synaqtar men qaterlerge jasalǵan taldaýynyń tereńdigi jáne búkil qoǵamdastyq úshin strategııalyq is-qımyl jospary jóninde shyn mánindegi tarıhı baǵdarlamalyq sózi elimizdiń Uıym ishindegi "qarym-qatynastar ekologııasyn" qalpyna keltirýge, EQYU-nyń belgili bir daǵdarysyna soqtyrǵan qasańdyqtar men qate túsinikterdi, senimsizdikter men kúmándanýshylyqty ózgertýge degen berik umtylysyn kórsetip berdi», dep jazady avtor.

«Keshe Premer-Mınıstr Kárim Másimovtiń tóraǵalyq etýimen «S» vırýsty gepatıti jaǵdaıy boıynsha jumys keńesi ótti. Keńeste Densaýlyq saqtaý mınıstri Jaqsylyq Dosqalıev osy másele boıynsha aqparat berdi. Mınıstr azamattardyń medıtsınalyq is-áreketterden, qan jáne ony almastyratyn zattardy quıý kezinde vırýs juqtyrýyn boldyrmaý maqsatynda júıeli sharalar qabyldanǵany jáne ınfektsııalyq baqylaý kúsheıtilgeni jóninde baıandady» delingen «Egemen Qazaqstan» gazetiniń búgingi sanynda jaryq kórgen «Infektsııalyq baqylaý kúsheıtiledi» atty maqalada.

Osy jaıtqa toqtalǵan «Kazahstankaıa pravda» gazetiniń jazýynsha, Úkimet basshysy Densaýlyq saqtaý mınıstrligi azamattardyń medıtsınalyq is-áreketter jáne tamyrishilik ınfýzııalar kezinde vırýs juqtyrýyna jol bermeý boıynsha júzege asyryp jatqan keshendi júıeli sharalardy maquldaǵan. Sondaı-aq, Premer-Mınıstr 1 mıllıard 700 mıllıon teńge kólemindegi qosymsha qarjylan­dy­rý týraly usynysty qoldaǵan.

Qańtardyń 21-inde Básekelestikti qorǵaý jónindegi agenttikte Úkimet basshysy Kárim Másimovtiń qatysýymen keńeıtilgen alqa májilisi ótti. Osy jıyn arqaý bolǵan maqala «Egemen Qazaqstan» gazetiniń juma kúngi nómirinde «Mańyzdy mindetke - mańyzdy nazar» degen taqyryppen jarııalandy. «Jal­py aıtqanda, 2009 jyly agent­tik 179 ret sotqa shaǵym­dan­dy. Qazir sonyń 60 isi boıynsha naqty sharalar qabyldanyp, sot sheshimi boıynsha kásipkerlerge 24,6 mlrd. teńge kóleminde aıyp­pul salyndy. Budan basqa qarjy sa­lasynda ekinshi deńgeıli bank­ter­diń zań talaptaryna qaıshy is-áreketteri anyqtaldy. Olardyń keı­biri jeke azamattarǵa jáne me­kemelerge iri kólemde nesıe berip otyrǵan. Al basqa bankter bolsa, nesıe suraǵan halyqtyń be­tin qaıtaryp kelgen. Osyǵan baı­lanysty qazir bankterdiń qyz­me­tine tekserýler júrgizilip, olar boı­ynsha tıisti sharalar qolda­nylýda», dep jazady basylym.

Al osy alqa májilisi arqaý bolǵan maqala «Aıqyn» gazetinde «Alańdaıtyn nárse az bolmaı tur» degen taqyryppen basylǵan. Básekelestikti qorǵaý agenttigi basshysynyń málimetinshe, 2008 jyly memlekettik kásiporyndardyń qyzmetinen bıýdjetke túsken dıvıdentter tek aşy kúlki ǵana týǵyzady - báriniń jabylyp, quıǵan tabysy bar-joǵy 1 mıllıard 520 mıllıon teńge ǵana! «Bul sol memlekettik kásiporyndardy ustap turýǵa memleket shyǵyndaǵan somadan 57 ese kem!» dedi M.Esenbaev. Úkimet álgilerge sol jyly «bir tıynyn eki et!» dep 87,5 mıllıard teńge beripti. Sonsha qarjynyń qaıda jumsalǵany, kimniń jutqynshaǵyna jutylyp ketkeni beımálim», dep jazady basylym.

Úkimet basshysynyń qatysýymen ótken alqa májilisi jaıynda «Kazahstanskaıa pravda», «Ekspress-K» basylymdarynda da keńinen jazylǵan.

***

«Jel turmasa, shóptiń basy qımyldamaıdy» degen sóz bar. Sońǵy birer apta ishinde: «31-telearna» qazaqtildi baǵdarlamalaryn jaýyp tastady, qazaqtildi jýrnalıster men qazaqtildi tehnıkalyq mamandar (operator, dybys, beıne ınjeneri), bas-aıaǵy 20-ǵa jýyq azamat jumystan bosatyldy» degen aqparat jeldeı esti. Aıtsa aıtqandaı, biz de arnanyń baǵdarlamalyq kestesinen «Zamandastar», «Kásipker», «Bıik maqsat» jáne kúzgi maýsymda ǵana tusaýyn kesken «Bilgirler báıgesi», «Pikir alańy» syndy baǵdarlamalardyń alynyp tastalǵanyn ańǵardyq, dep jazady «Túrkistan» gazeti. Maqala basylymda «31-telearnada» qazaqtildi bes baǵdarlamanyń kúni batty», degen taqyryppen jaryq kórdi.

2009 jyl - aýyr atletıka úshin sátti jyldardyń biri boldy. Qazaq sportynyń tarıhynda, ásirese Aýyr atletıka federatsııasynyń tarıhynda álem chempıonatynan tórt birdeı altyndy ıemdený bolǵan emes. Osyǵan oraı, «Túrkistan» basylymy san alýan saýaldaryn Aýyr atletıka federatsııasynyń prezıdenti Qaırat Turlyhanovqa qoıǵan. «Maqsat - qazaqtyń esimin álem arenasynda jańǵyrtý» degen taqyryppen berligen suhbattan federatsııa prezıdentiniń tuşymdy jaýaptaryn oqýǵa bolady.

***

Mádenıet jáne aqparat mınıstrliginiń bastamasymen Til saıasatyn júzege asyrýdyń jańa kezeńine arnalǵan Memlekettik baǵdarlamany ázirleýmen aınalysatyn jumys toby quryldy. Keshe osy jumys tobynyń alǵashqy otyrysy Mádenıet jáne aqparat mınıstri Muhtar Qul-Muhammedtiń tóraǵalyǵymen ótti. Alqaly jıyn arqaý bolǵan maqala «Aıqyn» gazetiniń búgingi nómirinde «Til tuǵyrdan túspesin!» degen taqyryppen jarııalandy. Maqalada jıynǵa qatysýshylardyń sóılegen sózderi jeke-jeke berilgen.

Osy jumys tobynyń alǵashqy otyrysyna arnalǵan maqalany «Kazahstanskaıa pravda», «Lıter» basylymdarynan da oqı alasyzdar.

«Aıqyn» gazetiniń dástúrli «Aq sóıle!» aıdarynyń búgingi qonaǵy - ekonomıka jáne bıologııa ǵylymdarynyń doktor, akademık Amanbek Aqaev. Ekeýara áńgime barysynda aıtylǵan jaıttardyń egjeı-tegjeıin basylymnyń búgingi nómirinde jarııalanǵan «Qazir balalar arasynda «biz aqqýdan taraǵanbyz» degen uǵym qalyptasa bastapty» degen suhbattan oqı alasyzdar.

***

Ótken jyldyń sońynda elimizdegi anaǵurlym túıtkildi bank retinde tanylǵan BTA bank pen Alıans banktiń basshylyǵy syrtqy qaryzdy qaıta qurylymdaýda kredıtorlarmen kelisimge kelgeni belgili. Búgingideı qarjylyq qıynshylyq jaǵdaıynda munyń ózi úlken jetistik. Deıturǵanmen, 2010 jyly bankırlerdi ońaı jyl kútip turǵan joq. Alda - tynymsyz tirlik, jankeshti jumys. Sonda ǵana el ishindegi bankter qalypty damý úrdisine ótedi degen senim bar. Endeshe, bıyl bankterdiń qyzmeti qalaı damymaq? Negizgi strategııalyq kúsh qaı salaǵa jumsalady? Osy jáne basqa saýaldardy «Ekonomıka» gazetiniń tilshisi BTA Banki Basqarmasynyń tóraǵasy Ánýar Sáıdenovke qoıǵan. Ekeýara áńgime «Biz ekonomıkanyń damýyna qyzmet ete bastaımyz» degen taqyryppen basylǵan

«Tarıfter taǵy qymbattady». «Jańa 2010 jyl kommýnaldyq qyzmetterdi paıdalanatyn pavlodarlyqtarǵa «tosyn syılaryn» birge ala keldi. Buǵan deıin qala turǵyndary 1 qańtardan bastap qoǵamdyq avtobýstarda, sonymen birge tramvaılarda júrý baǵasy 35 teńge bolatynyn estigen edi. Sonymen birge, pavlodarlyqtar turmystyq qoqys shyǵarý qyzmetiniń tarıfi ósetinen de qulaǵdar bolǵan. Byltyrǵy jeltoqsan aıynda jarııa etilgen lıftini paıdalanýdyń jańa tarıftik júıesi de turǵyndardyń ýaıymyn qoıýlata túsken. Endigi jerde, «jyǵylǵanǵa judyryq» demekshi, jyl basynan bastap Pavlodar qalasynda elektr energııasy men jylý qýaty, sý jáne káriz qyzmeti qymbattady», dep jazady «Ekonomıka» basylymy.