Infektsııalyq aýrýlarmen kúreske arnalǵan alǵashqy kongress óz jumysyn bastady
NUR-SULTAN. QazAqparat - Elordada «Jahandaný jaǵdaıyndaǵy ınfektsııalyq aýrýlar: máseleler men sheshimder» atty alǵashqy qazaqstandyq kongress óz jumysyn bastady, dep habarlaıdy QazAqparat.
Shara barysynda álemniń jetekshi ǵylymı ortalyqtarynyń ókilderi Ortalyq Azııa elderindegi vırýstyq jáne parazıtarlyq aýrýlar boıynsha epıdemıologııalyq jaǵdaı máselelerin, sondaı-aq densaýlyq saqtaý salasyndaǵy memlekettik saıasattyń ajyramas bóligi retinde vaktsınatsııalaý men ımmýndyq profılaktıkanyń mańyzdylyǵyn talqylaýda.
QR DSM Qoǵamdyq densaýlyq saqtaý ulttyq ortalyǵynan málim etkendeı, kongreske Ortalyq Azııadaǵy aýrýlardy baqylaý jáne aldyn alý ortalyǵynyń (SDC) ǵylymı qyzmetkerleri, Dúnıejúzilik densaýlyq saqtaý uıymynyń ókilderi, Reseı, Moldova, Qyrǵyzstan, Frantsııa, Italııa, Izraılden kelgen jetekshi ǵalymdar qatysty.
QR Densaýlyq saqtaý vıtse-mınıstri Kamaljan Nadyrov Qazaqstanda halyqtyń densaýlyǵyna bıologııalyq qaýiptiń tıgizetin yqpalyn tómendetý maqsatynda úlken is-sharalar kesheni júrgiziletindigin atap ótti. 90-nan astam ınfektsııalyq aýrýǵa epıdemıologııalyq qadaǵalaý jasaýdyń joǵarysezgishtik júıesi engizildi, elimizdiń zerthanalarynda dıagnostıkalyq qural-jabdyqtar parki únemi jańartylyp otyrady.
Qoǵamdyq densaýlyq saqtaý ulttyq ortalyǵy dırektorynyń orynbasary Rýslan Satyvaldeevtiń aıtýynsha, ınfektsııalyq aýrýlarmen tıimdi kúresý úshin bir ǵana medıtsınanyń kúshi jetkiliksiz: bilim, ǵylym jáne praktıkanyń, medıtsınalyq, veterınarlyq ǵylymnyń, sondaı-aq áleýmettik qorǵaý qyzmetiniń, psıhıologııa jáne otbasynyń birlesýi kerek. Salaýatty ómir saltyna beıildilikti qalyptastyrý, ınfektsııalyq aýrýlardyń aldyn alý týraly aqparattylyqty arttyrý mańyzdy ról atqarady.
Reseıdiń bas epıdemıology Nıkolaı Brıko óz sózinde densaýlyq saqtaý salasyndaǵy memlekettik saıasattyń quraly retinde ómirlik vaktsınoprofılaktıkany qoldaný tájirıbesimen bólisti: «Vaktsınoprofılaktıka mindetteri aıtarlyqtaı keńeıtildi: ol degenimiz tek aýrýlardyń aldyn alý, syrqattanýshylyqty jáne múgedektik pen ólim-jitimdi tómendetý ǵana emes, sonymen qatar halyqtyń ómir súrý sapasyn jaqsartý jáne belsendi uzaq ómirdi qamtamasyz etý bolyp tabylady», - dedi Nıkolaı Brıko.
Konferentsııa barysynda ınfektsııalyq aýrýlardyń aldyn alý salasyndaǵy jańa óńdeýler, sondaı-aq tumaý, JRVI, neıroınfektsııalar men pnevmonııa, ishek, zoonozdy, tropıkalyq ınfektsııalar, parazıtarlyq aýrýlar, vırýstyq gepatıtter, AITV/JITS jáne basqalar sııaqty halyq arasynda qoǵamdyq densaýlyqty qorǵaýǵa yqpal etetin ınfektsııalardyń taralýy boıynsha ósimniń basty sebepteri talqylandy.
Kongress 13 qyrkúıekke deıin sozylady jáne rezolıýtsııaǵa qol qoıýmen aıaqtalady.
Sharany Sanofı kompanııasynyń qoldaýymen QR Densaýlyq saqtaý mınıstrligi, QR DSM Qoǵamdyq densaýlyq saqtaý ulttyq ortalyǵy, Astana medıtsına ýnıversıteti jáne Infektsıonıst dárigerler qoǵamy uıymdastyrdy.
