Infektsııalyq aýrýlardan qalaı saqtanýǵa bolady
ASTANA. QazAqparat - Medıtsına mamandary elordalyqtardy ınfektsııalyq aýrýlardan saq bolýǵa shaqyrady, dep habarlaıdy QazAqparat tilshisi.
«Áleýmettik medıtsınalyq saqtandyrý qory» kommertsııalyq emes aktsıonerlik qoǵamy Astana qalasy boıynsha fılıalynyń baspasóz qyzmetinen habarlaǵandaı, medıtsınalyq saqtandyrý júıesiniń alǵysharttarynyń biri - profılaktıkalyq, ıaǵnı syrqattyń aldyn alý sharalary. Densaýlyq kepili - kez kelgen aýrýdyń aldyn alý. Qalypty kúıde aǵzanyń ımmýndyq júıesi adamdy qorshaǵan ortanyń zııandy áserlerinen, sonyń ishinde ártúrli mıkrobtar men vırýstardan qorǵaıdy. Al onyń qalypty júıesi buzylǵan jaǵdaıda, ıaǵnı ımmýnıtet álsirese adamnyń mıkrobtar men vırýstarǵa qarsy turýy tómendep, syrqattanǵysh keledi. Ásirese, aýa raıy kúrt buzylyp, kún sýyta bastaǵannan-aq aǵza syr bere bastaıdy.
Derekterge súıensek, 2018 jyldyń qorytyndysy boıynsha Astana qalasynda eresekter arasynda 1965 naýqas - joǵarǵy tynys joldarynyń jedel qabynýy, 690 - qozdyrǵyshtary belgili jedel tonzıllıt, 81 qozdyrǵyshtary belgisiz jedel tonzıllıt dıagnozdarymen tirkelgen. Al balalar arasynda 6 819 - qozdyrǵyshtary belgisiz tynys joldarynyń jedel ınfektsııasy, 266 - qozdyrǵyshtary belgili jedel tonzıllıt, 470 - qozdyrǵyshtary belgisiz jedel tonzıllıt, 32 joǵarǵy tynys joldary ınfektsııasy dıagnozdary anyqtalǵan.
«2019 jyly ınfektsııalyq aýrýlardy emdeý úshin qalalyq ınfektsııalyq aýrýhanaǵa 827,4 mln teńge, balalar ınfektsııalyq aýrýhanasyna 1 545,6 mln teńge bólindi. Bul, jalpy alǵanda, 2,3 mlrd qarjy. Ótken jylmen salystyrǵanda 0,3 mlrd somaǵa kóp», - deıdi ÁMSQ Astana qalasy boıynsha fılıalynyń dırektory Nurlybek Qabdyqaparov.
Infektsııalyq aýrýlardyń tumaý, jel sheshek, qyzylsha, rotovırýsty ınfektsııa jáne taǵy basqa túrleri óte kóp. Ár ınfektsııalyq aýrýdyń óz vırýstary, bakterııalary, qozdyrǵyshtary bar. Eń qaýiptisi - tolyq emdelmese aǵzanyń basqa da aýrýlaryn qozdyryp jiberedi. Sondyqtan ınfektsııalyq aýrýlardan saqtaný joldaryn bilgen jón.
«Qazirgi sátte maýsymdyq ahýalǵa baılanysty sýyq tııý, tumaý, baspa, tynys joldary syrqattary jıi kezdesedi. Belgileri jaǵynan uqsaıtyndyqtan bolar, kópshilik sýyq tııý men tumaýdy shatastyryp jatady. Sýyq tıgende adam aǵzasy ony ózi de jeńe alady. Keıde eleýli asqynýlar bolýy múmkin, árıne. Degenmen, ımmýndyq júıeni nyǵaıtý jáne sýyq tııý men tumaýdyń alǵashqy belgileri bilingen boıda qoldy jýý, tynys alý joldaryn (muryn, tamaq) shaıý, ıaǵnı gıgıenany, tazalyq sharalaryn saqtaı otyryp, saýyqtyrýdy júrgizip, kez kelgen asqynýlardy boldyrmaýǵa bolady», - dep keńes beredi mamandar.
Medıtsına salasy jetilgen, tehnıka damyǵan qazirgi ýaqytta, árıne, aýrýdy túrli joldarmen emdeýge bolady. Óz kezeginde, Áleýmettik medıtsınalyq saqtandyrý qory emdeý mekemeleriniń medıtsınalyq qyzmet kórsetý sapasyn óz baqylaýyna alǵan. Degenmen, aýrýdy emdegennen aldyn alǵan durys.
