Infektsıonıst maman koronavırýstan saqtanýdyń basty joldaryn eske saldy

NUR-SULTAN. QazAqparat – Nur-Sultan qalasynyń Kópsalaly medıtsınalyq ortalyqtyń ınfektsıonıst dárigeri Gúlnár Nájimova halyqtyń esine taǵy da qaýipsizdik sharalaryn saqtanýǵa shaqyrdy. Maman buǵan deıingi dárigerlerdiń keńesine ún qosyp, jabyq nysandar men buqara kóp jınalatyn oryndarǵa barmaý kerektigin eskertedi, dep habarlaıdy QazAqparat tilshisi.

«Kóp adam jeldetilmeıtin oryndarda bir-birine jaqyn jınalyp qalsa, koronavırýs ınfektsııasynyń taralý qaýpi ulǵaıa túsedi. Mundaı jaǵdaıda vırýstyń tamshy túrinde taralý qaýpi joǵary. Sol sebepti azamattardyń nysan ishinen qaraǵanda syrtta kezdesýi vırýstyń taralýyn edáýir tómendetedi. Jabyq nysandar men buqara kóp jınalatyn oryndarǵa barmaýǵa keńes beremiz», - dedi Gúlnár Nájimova OKQ alańynda ótken baspasóz máslıhatynda.

Infektsıonıst maman buǵan deıin dárigerler aıtyp kele jatqan gıgıenanyń qarapaıym erejesin esten shyǵarmaý kerektigin eskertedi.

«Qoldy spırtpen súrtip, sabynmen jýý kerek. Osylaısha qolǵa mıkrob juqpaıdy. Múmkindiginshe kózdi, aýzyńyzdy qolmen ustamańyz. Azamattar kóbinese qolymen kez kelgen zatty ustaǵandyqtan, vırýs qaldyqtarynyń aǵzaǵa ený yqtımaldyǵy joǵarylaı túsedi. Qolǵa qonǵan vırýs kózge nemese muryn, aýyzǵa jetip, sol arqyly aǵzaǵa jetýi yqtımal. Túshkirgende nemese jótelgende murnyńyzdy qolmen jappaýǵa tyrysyńyz. Qoldanylǵan sýlyq oramaldy birden laqtyryp otyrý kerek. Adamdar kóbirek qol tıgizetin zattardyń, esiktiń tutqasyn, krandyń, uıaly telefonnyń ekranyn árdaıym dezınfektsııalap otyryńyz», - dedi ol.

Gúlnár Nájimova ár adamnyń qyzýy kóterilip, jóteli paıda bolsa, álsizdikti sezse birden dárigerge júginýi kerektigin eskertedi. Sonymen qatar koronavırýs juqtyrǵan adamnyń ıis sezý qabileti tómendep, basy, tamaǵy aýyrýy múmkin.

«Aýrýdyń belgileri álsiz bolsa da azamattar úıinde qalyp, tolyqqandy jazylyp shyǵýy úshin oqshaýlanýy tıis. Turǵylyqty mekeni boıynsha emhanaǵa habarlasqany jón», - deıdi ol.

Eske sala ketsek keshe Nur-Sultan qalasy koronavırýs taralýynyń joǵary bolýyna baılanysty «qyzyl» aımaqta qalyp otyrǵany habarlanǵan bolatyn. Sonymen qatar «sary» aımaqta atalǵan óńirden basqa Almaty qalasy, Shyǵys Qazaqstan, Soltústik Qazaqstan, Aqmola jáne Atyraý oblystary jatyr.