Infektsıonıst dáriger qyzylsha belgilerin atady
ASTANA. QazAqparat – Elordadaǵy №3 kópbeıindi qalalyq balalar aýrýhanasynyń ınfektsıonıst dárigeri, medıtsına ǵylymdarynyń doktory Dınagúl Baeshova balalar arasynda qyzylsha qalaı ótetindigin túsindirdi, dep habarlaıdy QazAqparat tilshisi.
Qyzylsha - joǵary juqpaly jáne keń taralýymen sıpattalatyn jedel vırýstyq ınfektsııa. Bul - búkil álemdegi jas balalar arasyndaǵy syrqattanýshylyq pen ólim-jitimniń basty sebebi. 5 jasqa deıingi balalardyń 30 paıyzynda aýrý asqynýlardyń órshýimen sıpattalady. Ásirese, durys tamaqtaný salty joq jáne ımmýnıtet tapshylyǵy bar naýqastar jıi shaldyǵady.
«Infektsııa kózi - kataraldy kezeńdegi jáne bórtpe bastalǵannan keıingi alǵashqy 5 kúnde aýyryp júrgen naýqas. Infektsııa juqtyrýdyń uzaǵyraq merzimi pnevmonııamen asqynǵan jaǵdaılarda anyqtalǵan. Taralý joly – aýa tamshylary. Vırýs muryn-jutqynshaq shyryshynyń mıkroskopııalyq usaq bólshekterinde, tynys alý joldarynda kezdesedi, olar jótelgende jáne túshkirgende naýqastyń aınalasyna ońaı taraıdy», - dedi ol Astana qalalyq kommýnıkatsııalar qyzmetindegi brıfıng barysynda.
Onyń atap ótýinshe, qazirgi ýaqytta elimizde qyzylshanyń órshı túskeni baıqalady. Sondyqtan da medıtsına qaýymy alańdaýshylyq tanytyp otyr.
