Infarkt, ınsýltten keıingi tegin ońaltý: ony qalaı alýǵa bolady

Insýltten, ınfarkttan, jaraqattan nemese operatsııadan keıin ońaltý emi negizgi emdeýden kem túspeıtin mańyzdy kezeń bolyp sanalady. Kóptegen patsıent medıtsınalyq ońaltýdyń tek mamandandyrylǵan ortalyqtarda ǵana emes, tirkelgen emhanasynda da qoljetimdi ekenin bile bermeıdi.

Almaty qalasyndaǵy №16 qalalyq emhananyń Ońaltý jáne qalpyna keltirý emi ortalyǵynyń meńgerýshisi Nazerke Mırzambekqyzy Uldaqanovanyń aıtýynsha, medıtsınalyq ońaltý TMKKK jáne MÁMS sheńberinde kórsetiledi.

Ýchaskelik dárigerdiń joldamasy boıynsha patsıentter emdik dene shynyqtyrýdy, fızıoterapııany jáne basqa da ońaltý ádisterin qamtıtyn qalpyna keltirý eminen óte alady. Ońaltý baǵdarlamasy ár patsıenttiń dıagnozyna, densaýlyq jaǵdaıyna jáne jeke qajettiligine qaraı ázirlenedi.

Ońaltýdyń basty maqsaty – adamnyń joǵaltqan fýnktsııalaryn qalpyna keltirýge, qozǵalý qabiletin jaqsartýǵa, ózine-ózi qyzmet kórsetý deńgeıin arttyrýǵa jáne ómir sapasyn jaqsartýǵa kómektesý.

Qazaqstanda medıtsınalyq ońaltý úsh kezeń boıynsha júzege asyrylady:

● 1-kezeń – aýrýdyń jedel kezeńinde (alǵashqy 72 saǵat ishinde), hırýrgııalyq aralasýlar men jaraqattar kezinde statsıonar deńgeıinde júrgiziledi;
● 2-kezeń – aýrýdan nemese jaraqattan keıingi jedel jáne erte qalpyna kelý kezeńinde (alǵashqy 6 aı ishinde), sondaı-aq aýrýdyń qaldyq kórinisteri kezinde joǵary tehnologııalyq medıtsınalyq kómekti qoldana otyryp statsıonarlyq uıymdarda júzege asyrylady;
● 3-kezeń – ambýlatorııalyq-emhanalyq uıymdarda, kúndizgi jáne táýlik boıy jumys isteıtin statsıonarlarda, ońaltý ortalyqtarynda jáne sanatorıı-kýrorttyq uıymdarda júrgiziledi.

2026 jyldyń alǵashqy jartyjyldyǵynda Almaty qalasynda 11 555 patsıent medıtsınalyq ońaltý kýrsynan ótti. Onyń ishinde 5 412 adam ońaltýdyń ekinshi kezeńinde, al 6 143 adam úshinshi kezeńinde medıtsınalyq kómek aldy.

Aıta ketelik Astanada qaıtys bolǵan donordyń júregi 59 jastaǵy naýqasqa sátti transplantatsııalandy.