Infantınonyń josparyn synaǵan FIFA basshylarynyń biri qyzmetinen ketti
ASTANA. KAZINFORM – Halyqaralyq fýtbol federatsııasynyń (FIFA) operatsııalyq dırektory Kevın Lamýr uıym prezıdenti Djannı Infantınonyń jarystardaǵy úlesti jeke ınvestorlarǵa satý josparyn qatań synǵa alǵannan keıin úsh apta ótpeı qyzmetinen bosatyldy, dep habarlaıdy BBC.
FIFA ókili Kevın Lamýrmen eńbek qatynastary 2026 jylǵy 17 tamyzda toqtatylǵanyn rastady.
– FIFA Kevınge eki jyldyq eńbegi úshin alǵys aıtyp, aldaǵy ýaqytta sáttilik tileıdi, – delingen uıym málimdemesinde.
FIFA qyzmetkerlerine bul sheshim týraly bas hatshy Mattıas Grafstrom habarlaǵan. Onyń dúısenbi kúni keshke jibergen elektrondyq hatynda taraptardyń «joldaryn bólýge keliskeni» aıtylǵan.
Ótken aıda Lamýr FIFA Forward Enterprise (FFE) kompanııasyn qurý jónindegi daýly jospardy «bir adamnyń jobasy» dep ataǵan. Joba FIFA jarystaryndaǵy úlesti jeke ınvestorlarǵa satýdy kózdegen.
Ol sondaı-aq FIFA basshylyǵynyń bul jobaǵa qatysty «jańylystyrylǵanyn» málimdedi. Keıin uıym atalǵan jospardan bas tartqan.
– FIFA-nyń júzdegen yntaly, óz isine berilgen jáne adal qyzmetkeriniń mindeti – fýtbolǵa qyzmet etý. Prezıdent adamdardy biriktirip, jaqyndastyryp, shabyttandyrýy kerek. Búginde biz buǵan múldem qarama-qaıshy jaǵdaıdy kórip otyrmyz, – degen edi Lamýr.
Ol jumys berýshisine adal bolýǵa mindetti ekenin moıyndaǵanymen, belgili bir qundylyqtar men áriptesteriniń aldynda da jaýapkershiligi bar ekenin aıtqan.
– Eger osy úshin jumysymnan aıyrylsam, solaı bolsyn. Bul sheshimdi túsinistikpen jáne qurmetpen qabyldaımyn. Eń bolmaǵanda búgin túnde ar-uıatym taza bolyp, tynysh uıyqtaımyn, – dedi ol.
Kevın Lamýr FIFA-ǵa 2024 jylǵy qarashada kelgen. Buǵan deıin ol UEFA bas hatshysynyń orynbasary qyzmetin atqarǵan. FIFA-nyń basqarý ıerarhııasynda ol Djannı Infantınodan eki saty tómen turǵan.
Eske sala ketsek, FIFA synnan keıin týrnırlerge jeke ınvestıtsııa tartý josparynan bas tartqan edi.
Sondaı-aq FIFA Infantınoǵa qatysty jańa aıyptaýlardy joqqa shyǵardy.
Al Eýropanyń birneshe eli Infantınony FIFA prezıdenttigine qaıta saılaýǵa qarsy ekenin málimdedi.
